首頁 arrow 綠色短評 arrow 釣魚台到底是啥人的?

釣魚台到底是啥人的? PDF 列印 E-mail
發表者 李南衡   
2015/09/11, Friday
李登輝前總統七月二三佇日本koh一遍講「尖閣群島」(台灣人叫作「釣魚台」)是日本的領土。總統府發言人聲明:「任何否認我國有釣魚台列嶼主權的講法,攏是喪權辱國的言行。」馬總統講照國際法釣魚台已經正式還͘中華民國。 今年七月二七,《民報》刊登Louis Lee佇伊的面冊寫的文章〈Kā馬關條約看清楚,根本無釣魚台〉。內底一寡重要的事實值得介紹hō͘ khah濟人知影。   伊講:1895年一月,日本kā尖閣群島(釣魚台)併入沖繩(Okinawa)縣,仝一年四月十七,日清才簽訂《馬關條約》(日本人叫作《日清講和條約》),寫kah真清楚:清國割hō͘日本的島嶼,台灣部分是「東經119度至120度;北緯23度至24度範圍內的島嶼」。釣魚台是佇:東經123度27至124度34;北緯25度44至56。釣魚台無佇清國割hō͘日本島嶼的範圍內底。   二次大戰了,1951年日本kah同盟國簽訂《舊金山和約》,和約第二條聲明,日本承認朝鮮獨立、放棄台灣澎湖等島嶼的權利。1952年,日本單獨kah佇台灣的中華民國簽訂《中日和約》,放棄對台灣、澎湖群島的一切權利、權利名義kah要求。簽約的時,台北要求日本用「歸還」、mài用「放棄」的字眼,以確定台灣的主權屬於中國。日本堅持使用「放棄」的理由是:日本是戰敗國,無立場對chiah-ê土地做任何處理,伊bē-tàng決定chiah-ê土地是啥人的,伊干單會tàng「放棄」niā-niā,干單戰嬴的同盟國才有權利決定。可見,今仔日台灣海峽兩岸的中國人講「日本kā台灣澎湖交還hō͘中國」完全是白賊話!   二次大戰後,由代表盟軍的美軍佔領Okinawa群島,1947年聯合國安理會通過kā Okinawa群島交hō͘美國「託管」。1971年六月十一,美國kā Okinawa群島行政管理權歸還日本,其中有包含「尖閣群島」(咱講的「釣魚台」)。   「尖閣群島」會有問題,是因為1968年十月,聯合國亞洲經濟開發委員會調查報告,講「尖閣群島」附近的海底有蘊藏大量的石油。台灣才注意tio̍h「釣魚台」一直是咱宜蘭漁民傳統的漁場,緊講釣魚台是台灣的領土。1970年海外留學生kah台灣的大學生發起「保釣運動」。其實「國防研究院」出版的《中華民國地圖集第一冊:台灣省》1959、1963、1967年三版,中華民國領土攏無釣魚台,《世界地圖集》有kā「尖閣群島」畫佇日本領土內底。中國那會講「釣魚台」是中國的?In講「釣魚台」是台灣的,台灣是中國的,所以「釣魚台」是中國的。   八月二三,馬英九總統投書美國《華盛頓時報》講釣魚台自古就屬中國。有讀冊的李登輝前總統講,馬英九有才調派兵去佔釣魚台!馬英九去問美國一下,看美國講釣魚台是啥人的?
 
< 前一個   下一個 >