首頁 arrow 綠色短評 arrow 你講洪秀柱是啥物神?

你講洪秀柱是啥物神? PDF 列印 E-mail
發表者 李南衡   
2015/09/21, Monday
王小姐問伊交往兩年外的查埔朋友小林:「你有愛我無?」小林應講:「我最近工課真濟,心情真煩,chitmài問我chit號問題。」王小姐死心問講:「你chit陣心真煩無愛回答我的問題,意思是有愛我,tio̍h m̄ tio̍h?」小林恬恬無應。王小姐問講:「你恬恬無講話的意思是tio̍h是有愛我?」小林無伊法,應講:「我會愛我所愛的人。」你若是王小姐的好朋友抑是親人,你會按怎苦勸王小姐mài hiah呢戇面? 前幾工,中華職業棒球桃猿隊的鼓動助威隊「LamiGirls」內底的三位小姐「伊梓帆」,因為幫中國國民黨總統參選人洪秀柱翕桌曆的相片,球團以in三個人無向球團報備作理由kā in禁賽,而且hō͘網友烏白罵,引起洪秀柱的不滿。九月十五早起,洪秀柱召開記者會,「伊梓帆」chit三位小姐流目屎發出聲明回擊講,球團講in無報備是違約,事實上in並無kah球團簽約、in翕相作洪秀柱的桌曆mā無用球團的名義。洪秀柱kā in安慰講:「我知影恁會艱苦心,m̄免,恁的表現非常真誠、真勇敢。」伊koh講:「Chia敢m̄是一個民主多元包容的社會?我有影m̄知影chit幾個查某囝仔做m̄-tio̍h啥物代誌。」   媒體佇當場問「伊梓帆」未來是m̄是會繼續參加「thīn柱」活動?洪秀柱mā隨時接落去問講:就是講你敢koh繼續「thīn柱」bo͘?梓寗應講:目前心情猶未平復,無想kah hiah-e。主持人接leh問講:猶會繼續「thīn柱」bo͘?洪秀柱mā koh tòe落去問:敢會koh繼續「thīn柱」?梓寗簡單回講:支持tio̍h的代誌kah tio̍h的人。伊kā mài-khù下落來,無koh作任何回應。Chit時洪秀柱猶koh細細聲仔問講:按呢是m̄是有beh繼續「thīn柱」?梓寗攏無koh講話。   九月十六早起,kah洪秀柱仝黨的中國國民黨立法院黨團召開記者會,in可能認為che是製造「藍綠對決」上好的機會,副書記長王育敏引用「旺旺中時媒體集團」下面《周刊王》的報導,質疑Lamigo「桃猿隊」球團是桃園市的球隊,因為政治考量,beh phô͘民進黨市長鄭文燦,才會修理替洪秀柱翕桌曆相片的LamiGrils三個成員「伊梓帆」,桃猿隊應該出來解釋清楚。桃猿隊領隊劉玠廷再度強調,in無beh插泛政治化的講法,呼籲逐個kā焦點囥佇球賽頂面。Kā運動貼標仔、政治化,真m̄好,運動是無色的,mā是藍綠各種色的共同語言。   Chit遍的總統大選真鬧熱,koh麻煩眾神出動。有人講某某參選人是「媽祖婆」,有人講某某參選人是「觀世音」,有人講某某參選人kō kah歸頭滿面攏是lo̍k-kô͘-á-moâi是「泥菩薩」。你講洪秀柱是啥物神?你講伊是m̄是「大面神」?
 
< 前一個   下一個 >