首頁 arrow 綠色短評 arrow 癢(chiūⁿ)的m̄扒,無癢的柝(kho̍k)柝扒!

癢(chiūⁿ)的m̄扒,無癢的柝(kho̍k)柝扒! PDF 列印 E-mail
發表者 李南衡   
2015/09/25, Friday

新聞bat報導,有人貪tio̍h去泰國旅遊一禮拜免錢,「想貪戴雞籠(lam)」轉來到桃園國際機場hông掠去,才知影原來招待in去泰國免費旅遊的是毒品走私犯,in是帶毒品的現行犯。那像日本俗語話所講的:「免錢的上貴。」

仝款的道理,每遍台灣大選的三個月前甚至半年前,tio̍h有村里長請逐個報名,三工兩暝旅遊才五百元niā-niā,hō͘報名參加旅遊的人比較khah心安,想講in chit chōa旅遊mā有出tio̍h錢,出大錢的是某一個政黨抑是候選人。Chit種變相買票的活動至少有十外年,逐個攏知,干單檢調單位m̄知。有奇怪。   台灣大選koh逼近lo̍h,無仝款的齣頭應該mā會直直出現。林淑芬立法委員佇伊的面冊頂面PO一篇「萬人免費遊覽廈門四工」的文,講中國各省旅遊局、各國營企業贊助經費,hō͘台灣民眾參加旅遊團去中國旅遊。伊講,世間那有食免錢的中晝頓,伊懷疑che是teh買台灣人的良心,tī大選前按呢作,是m̄是替特定的政黨、特定的候選人縳柱仔腳?承辦的旅行社講確實有chit件代誌,chit遍的旅行團是由中國各地的旅遊局贊助的,是為tio̍h推廣中國的旅遊,hō͘台灣的旅行社去申請。林淑芬立法委員表示,chit款的「萬人免費旅遊」ùi兩年前to̍h開始有陸續舉辦。中國旅遊局抑是「對台辦」攏會kā錢交hō͘台商交代in轉來台灣組團去中國旅遊,也就是由中國共產黨出錢,來影響台灣的選舉。旅行社負責人講,in干單知影做生理,其他有啥物縳柱仔腳、統戰,政治的代誌in攏 m̄ bat。伊講參加旅遊團的人客並m̄是完全費費,mā是tio̍h繳四千元的報名費。「萬人免費旅遊」已經辦兩三年ah,那像無聽講檢調單位有去查。   九月二三,立法院中國國民黨團指控民進黨總統參選人蔡英文募款餐會會牴觸tio̍h政治獻金,要求檢調單位注意。法務部次長陳明堂佇立法院接受訪問的時講:就是講單純的餐會,mā tio̍h注意mài hō͘人起懷疑才好,有賄選的問題抑無,檢察官會加強查察,若是有對價關係tio̍h有賄選嫌疑。按呢看起來,法務部次長陳明堂對民進黨餐會募款chit件代誌有認真!無黨產的民進黨選舉的經費上主要tio̍h是小額募款kah辦餐會賣餐券,而且有民進黨到taⁿ攏mā按呢辦。看民進黨chit遍總統kah立法委員大選勢面那像bē bái,中國國民黨的立法委員除了chhōe孔chhōe縫以外,那像無啥物步ah!募款餐會kah賄選有啥關係?笑死人!   咱台灣有一句俗語講:「癢的m̄扒,無癢的柝柝扒!」是teh罵世間竟然有比戇kah bē曉扒癢的人koh khah戇的人。咱m̄敢懷疑法務部次長陳明堂kah檢調單位是m̄是戇人,不過,in的「不作為」kah「作為」,有奇怪。
 
< 前一個   下一個 >