首頁 arrow 綠色短評 arrow 習近平佇美國的演講,讚!

習近平佇美國的演講,讚! PDF 列印 E-mail
發表者 李南衡   
2015/10/02, Friday

九月二二至二五,中國國家主席習近平頭一遍去美國作國事訪問了後,九月二六去紐約佇聯合國總部向聯合國大會發表演講。不過咱台灣人khah注目關心的是,九月二二暗佇美國華盛頓(Óa-sīn-tòn)州西雅圖(Sí-á-thoh)市,出席華盛頓州當地政府kah美國友好團體聯合舉辦的歡迎宴會所發表的演講。伊演講的內容,有兩點咱tio̍h大聲阿老喝:讚!

伊佇演講中講,中國堅持行和平發展的道路。歷史hō͘阮一個重要的啟迪,就是和平發展是人間的正道,一切通過武力侵略謀取強權kah霸權的企圖攏是背逆歷史潮流的,攏是會失敗的。中國人2000外年前tio̍h有認識到「國雖大,好戰必亡」的真理。中國一向奉行防禦性國防政策kah積極防禦的軍事戰略。我願意佇chia重申,無論發展到tó一步,中國永遠bē去稱霸、mā永遠bē舞擴張。   讚讚讚!咱台灣人攏tio̍h kā習近平主席拍phok仔。   習近平主席伊應該知影,咱台灣人是愛好自由和平、對tó一國的人攏是友善親切的,而且mā完全無意beh kah包括中國在內的四箍圍的國家作對頭。咱台灣無任何攻擊性的武器,干單有防禦性武器。咱台灣人teh追求的是民主自由平等、尊重人權、安居樂業的美夢。不過咱上驚的是中國有兩千外粒、koh年年teh增加的飛彈向台灣、而且中國的頭人以前攏是以「無放棄用武力解決台灣」作前提。今仔日聽tio̍h中國國家主席習近平講「中國堅持行和平發展的道路」,而且知影「國雖大,好戰必亡」的真理。hō͘咱台灣人大大放心起來,咱台灣人誠心期待習近平主席訪問美國了後、轉去中國會有大改變大轉向,無koh用兩千外粒飛彈向台灣,台灣萬幸,台灣萬幸!台灣kah中國原本tio̍h會tàng作好厝邊、好朋友,甚至會tàng作親蜜相疼痛的兄弟仔。   Koh一點咱mā kā大大阿老。習近平主席講,國際社會應該tio̍h以互相尊重kah互相信任的原則,共同建構和平、安全、開放、合作的網絡空間。中國會繼續推進反腐敗鬥爭,願意kah國際社會作夥積極開展反腐追逃合作。中國人民希望佇chit方面得tio̍h美國支持kah配合,hō͘腐敗分子佇海外永遠無「避罪天堂」。 咱台灣人完全會tàng體會習近平主席講chiah-ê話是偌呢痛心,因為咱台灣mā有一寡經濟犯soan去中國。咱若kā習近平主席講的尾仔兩句小改一下,kā「中國」改作「台灣」,kā「美國」改作「中國」mā真通:台灣人民希望佇chit方面得tio̍h中國支持kah配合,hō͘腐敗分子佇海外永遠無「避罪天堂」。   咱阿老習近平的演講讚,伊若真正按呢做koh khah讚!
 
< 前一個   下一個 >