首頁 arrow 綠色短評 arrow 誠實是chiah呢要緊!

誠實是chiah呢要緊! PDF Print E-mail
Written by 李南衡   
Monday, 12 October 2015

美國Kansas市郊一間中學的女教師,因為學生無誠實,火to̍h辭職,引起社會真大的反應。Chit位女教師是高中二年的生物老師,伊要求學生作一個生物報告,結果發現班裡有二八個學生是ùi網路頂面現有的材料抄落來的。其實伊會使放目͘過、抑是小罵一下,教示學生後擺使按呢,大事化小、小事化無。偏偏chit位女教師認為學生無誠實才會偷the̍h別人拍拚研究的成果,kah考試作弊無差別,chit二八個學生chit學期的生物課成績攏總零分。當然引起二八個學生家長的抗議,向學校施壓,要求chit位女教師重新拍分數。家長內面也有議員、也有政府官員、也有學校的董事,學校接載(chih-chàibē tiâu,只好拜託chit位女教師屈從,無想tio̍h chit位女教師無beh接受施壓,伊一下火to̍h提出辭職。

經過新聞報導引起熱烈討論,學校無想tio̍h會引起chiah呢大的風波,佇學校體育館舉行公開會議,聽取各方面的意見。結果,來參加會議的市民kah學生家長大多數支持chit位女教師的作法。不得已,當場徵求學校老師的意見,大多數老師講,學校若是按呢來滿足二八位家長的要求,in mā beh提出辭職。因為in認為:教育學生成作一個誠實的公民,比通過一門生物課加幾十倍重要。學校只好照chit位女教師的決定,而且挽留tiâu chit位女教師。Khah意外的是chit位女教師逐工都有接tio̍h邀請伊去做工課的聘書。有一位企業家佇一場演講中提起chit件代誌講:「一個人會使失去財富、失去職業、失去機會,但是絕對bē-tàng失去信用。咱的社會tio̍h 認真做到hō͘無誠實的人寸步難行才tio̍h!」   咱台灣的社會是m̄是有向正面、誠實的方向teh行?假使今仔日台灣若出現一位kah美國chit位女教師仝款的老師,伊是m̄是會屈服佇壓力之下?咱社會敢會發出支援一位女教師公義的聲音?咱坐佇懸位的領導者敢有chhōa頭作誠實的人、講誠實的話?美國獨立宣言的主要起草者、美國第三任總統Thomas Jefferson講:誠實是「智慧冊」的第一課。意思是講誠實上要緊,若無誠實,無論有偌呢飽的學問mā是無智慧。咱若自細漢囝仔tio̍h有嚴格要求誠實,咱的社會beh那會有烏心油、烏心食品?beh那有假冒的偽劣商品?beh那有貪官污吏?beh那有官商勾結的代誌?beh那有欺騙人民的政府?beh那有無beh照呼照行的政治人物?beh那有明明由初選制度產生、完全合法的總統候選人、講beh kā換掉tio̍h會使kā換掉、而且動作chiah呢粗殘(chho͘-chhân)咧?   雖然咱攏知影:誠實是chiah呢要緊!但是,若照咱台灣現此時的各種現象來看,咱離誠實的社會猶koh誠遠!
 
< Prev   Next >