首頁 arrow 綠色短評 arrow 中國國民黨講「團結」,敢m̄驚笑破人的嘴?

中國國民黨講「團結」,敢m̄驚笑破人的嘴? PDF 列印 E-mail
發表者 李南衡   
2015/10/19, Monday
十月十五,中國國民黨主席朱立倫佇in黨的中常會決議,十月十七beh開臨時全代會原本照民主程序提名的總統參選人洪秀柱挽掉。前幾工講是beh「徹銷」那像有法律問題,緊改講是beh「廢止」洪秀柱提名案。 朱立倫主席講,十七是咱凝聚共識的時陣,是「ùi心團結」的時陣。伊是m̄是講洪秀柱參與黨內總統參選人到taⁿ,頂頂下下攏是「捾一支嘴的團結」?朱立倫主席講,十七以後「咱tio̍h是團結的國民黨」。是按怎十七以前m̄是咧?四月初三,立法院副院長洪秀柱宣布參選總統,tī che進前,中國國民黨副主席郝龍斌、中華民國副總統吳敦義兩位宣布無beh參選總統,四月二十洪秀柱去黨中央領表進前,黨主席朱立倫宣布無beh參選總統,所以洪秀柱講伊是「拋磚引玉」,希望引出「A腳」的天王出來選.五月十五立法院長王金平宣布無beh參選總統。五月十七洪秀柱去中央黨部登記參選,五月二十確定干單洪秀柱一個有hāⁿ過登記戶碇,是唯一的參選人。好笑的是無代無誌訂一個「防磚條款」-看民調結果有超過30%無?六月十二、十三進行初選民調,十四公布民調結果,洪秀柱以平均46.2%通過。七月十九中國國民黨全代會正式提名洪秀柱作總統參選人,當場有總統副總統、黨主席副主席、1,353位黨代表見證,宣布正式提名洪秀柱作中國國民黨總統參選人,由朱立倫黨主席授戰旗,全場拍phok仔三十秒。你敢有算十月十七挽掉洪秀柱總統參選人資格,全場拍phok仔拍幾秒鐘?   問題出佇中國國民黨原本tio̍h是一個獨裁威權的政黨,根本m̄知影啥物叫作民主政治,歷來總統候選人攏是逐個拍phok仔一致通過的。啥知chit遍幾個「A腳天王」攏m̄敢出聲領表講beh參選總統,立法院副院長洪秀柱才會去登記領表參選。中國國民黨明明無hit號尻川,敢食「民主程序提名總統候選人」chit帖瀉藥,中國國民黨hit號身命bē堪得lah!天王一直攏無LP,洪秀柱一再表明伊是「拋磚引玉」,時間一下拖久,害hit塊磚仔煞懷疑伊家己是一塊「玉」。洪秀柱已經選kah茫茫ah,朱立倫黨主席忽然間決定十月十七開臨全代會,beh kā一位(朱立倫所講的)「對黨的愛kah忠誠永遠無變」的洪秀柱挽掉。中常會通過中常委厲耿桂芳提案,照黨章規定頒發獎章表揚洪秀柱為黨奮鬥的精神。   Kah三個月前仝款佇台北國父紀念館,仝款hit陣黨代表、仝個總統副總統、仝個黨主席副主席、仝款的布景,三個月前講提名洪秀柱作總統參選人是為tio̍h團結,三個月後講挽掉洪秀柱總統參選人mā是為tio̍h團結。你若是洪秀柱敢bē掠狂?中國國民黨講「團結」,敢m̄驚笑破人的嘴?
 
< 前一個   下一個 >