首頁 arrow 綠色短評 arrow 台灣海峽兩岸維持啥物現狀?

台灣海峽兩岸維持啥物現狀? PDF 列印 E-mail
發表者 李南衡   
2015/10/30, Friday
民進黨總統參選人蔡英文對海峽兩岸的看法是「維持現狀」。馬英九總統、hông挽掉hit-ê總統參選人洪秀柱、chit-má beh作中國國民黨總統參選人朱立倫,攏問蔡英文到底是beh「維持」啥物「現狀」?問kah生勤勤(chhi-kìn-kìn),假那掠tio̍h蔡英文主席的頭鬃尾、chit聲好勢ah。其實chiah簡單的問題,免勞煩蔡英文主席浪費寶貴的時間來插inche hō͘阮小百姓來回答tio̍h好。 台灣海峽兩岸「維持現狀」就是:台灣海峽兩岸的人民,你作你的中國人,我作我的台灣人,也就是「一人一家代,公媽隨人祀(chhāi)」;In的人民銀行印人民幣hō͘中國人用,咱台灣的中央銀行印新台幣hō͘台灣人用,互相無交插;In中國的「人民解放軍」保護中華人民共和國的疆土、中國人民的生命財產安全,咱台灣的「中華民國國軍」保護中華民國的疆土、台灣人民的生命財產安全,絕對m̄是一個台灣退休白癡將軍所講的:國軍共軍攏是中國軍隊;中國的首都是北京市、台灣的首都是台北市;中國人民出國用中華人民共和國護照、台灣人民出國theh中華民國護照;中國人納稅金hō͘中華人民共和國政府、台灣人民納稅金hō͘中華民國政府;中國上懸的領導者是中華人民共和國國家主席、上大的行政首長是總理,台灣上懸的領導者是中華民國總統、上大的行政首長是行政院長;中國上大的領導者、一直到省長縣長攏m̄是人民選的、中國人民無權利選擇家己的政府,台灣上懸的領導者總統、一直到縣市長、各級的民意代表、鄉鎮長、甚至連里長mā攏是人民家己選出來的,有任期,到時會tàng kā犯錯傷濟,無合民意的執政者kah民意代表ián掉換別人。中國強調社會「和諧」、bē-tàng隨便批評政府,台灣主張民主自由、出在你批評指責政府;中國網民看bē-tio̍h政府不准你看的外國網站、無啥物「面冊」、“line”、“twitter”等等,台灣的網民真幸福、beh創啥beh看啥是你的自由;中國人隨時會pháng見,連維護人權的「維權律師」都會失踨去,那親像三十年以前台灣tī白色恐怖時代、人權無受尊重保護仝一樣。Bat有hit種恐怖經驗的台灣人,當然希望「維持」現此時台灣chit種自由民主、人權受尊重的「現狀」,無愛倒退lu轉去三十年以前的台灣,koh-khah無愛改變成作kah現此時的中國仝款。   維持現狀,絕對m̄是照中國國民黨主席朱立倫佇中國領導者習近平面前所講的「兩岸同屬一中」、mā m̄是中國國民黨前總統參選人洪秀柱所講的「一中同表」。維持現狀tio̍h是維持台灣海峽hit-pêng的中國叫作中華人民共和國,台灣海峽chit-pêng的台灣現此時叫作中華民國。Chiah簡單的代誌,那會m̄-bat?
 
< 前一個   下一個 >