首頁 arrow 綠色短評 arrow 連chiah be7見笑e5白賊話也講會出來!

連chiah be7見笑e5白賊話也講會出來! PDF 列印 E-mail
2008/12/26, Friday
        白賊話有真濟種,有e5白賊話是善意e5,像講你有可能對病中e5親友講:「你e5面色加真好看。」「現代醫藥真進步,你e5病應該無問題、免煩惱。」等等。有e5白賊話並無惡意ma7對人無傷害,像講你去人兜人拄拄teh食飯,明知伊講:「做夥來食!」chit句話是客氣e5白賊話,你ma7客氣倒轉去講白賊:「免客氣,我拄拄食飽。」有一種白賊話是相當be7見笑,而且是傷害tioh8真濟人e5。像講最十二月二三,中國兩隻貓熊來台灣,咱就聽tioh8koaN7 be7 見笑e5白賊話。

        海基會副董事長兼秘書長高孔廉講,貓熊來台灣「及是m7是國內外交易無關係。」但是,華盛頓公約秘書處表示:「貓熊去台灣屬中國國內交易。」陸委會講,貓熊來台灣tioh8憑輸出入文件才會tang3通關,若是「國內交易」,就無通關e5問題。伊e5意思是講,若是有輸出入文件就m7是國內交易。中國去香港e5貨物明明是「國內交易」,是按怎一定tioh8輸出入文件才會通關咧?

  中國e5媒體佇十二月二三hit工報導講,團團、圓圓兩隻貓熊今仔日beh去台灣,台灣e5領導人馬英九及中國國民黨主席吳伯雄攏會去機場恭迎。拜託一下,團團及圓圓chit兩隻畜生敢是馬英九及吳伯雄in7祖公祖媽?是按怎in tioh8去機場「恭迎」咧?事實上hitin兩位根本都無去機場。

  團團、圓圓chit兩隻貓熊來到木柵台北市立動物園e5時,傷過離譜e5是,台北市議員徐佳青接tioh8木柵居民通報,講台北市立動物園e5國旗那會hong5 liu5落來?伊趕緊拼去看,動物園大門口e5國旗有影無去ah!伊真受氣質問動物園管理人員,動物園發言人金仕謙表示,因為昨昏落雨,國旗沃澹去,早起koh落雨,致使猶未ka7國旗升起去。記者問講早起好天那有落雨?金仕謙發言人緊改講:「因為國旗猶未乾,所以早起才無升旗。」看tioh8徐佳青議員到現場質問,動物園才趕緊ka7國旗升起去。徐議員問講:「恁動物園to2一工bat ka7沃澹去e5國旗liu5落來曝?若有chit號紀錄你ka5講。若無,恁按呢亂舞,審預算e5時我會好好及恁討論。」有記者去追查,原來che是為tioh8 beh hou7中國來e5媒體記者方便,mai3tioh8中華民國國旗,報紙刊登講,連沿路所有e5國旗ma7攏閃kah無看e5影。

  Ui3 chit兩隻貓熊來台灣咱所看tioh8 e5現象、所聽tioh8 e5話,真正會hou7haiN3頭。咱會hiaN3頭不但是徐佳青議員所講e5 in「亂舞」,koh khah可惡e5是,inchiahbe7見笑e5白賊話也講會出來!
 
< 前一個   下一個 >