首頁 arrow 綠色短評 arrow 台灣人teh beh bē喘氣ah!

台灣人teh beh bē喘氣ah! PDF Print E-mail
Written by 李南衡   
Tuesday, 17 November 2015
十月底,環保監測顯示,台灣西半部「細懸浮微粒」也就是一般所講的PM2.5濃度偏懸,chit半個月來,全台灣的天攏phú-phú霧霧。環保署即時監測PM2.5,發現台中to̍h有三個站出現代表空氣污染濃度非常懸的「紫色燈號」,雲林的斗六、台西出現「紫色燈號」。台灣西半部空氣污染m̄-nā無減輕,十一月初九佇西半部的十四個監測站分別測tio̍h每立方公尺PM2.571138毫克,攏是上嚴重的「紫色燈號」,而且是入秋以來台灣空氣上lah-sap的一工。連北部新北市的新莊有70毫克、台北市的士林都有65毫克。世界衛生組織建議PM2.5的濃度m̄-thang超出每立方公尺35毫克,台灣上輕的超過一倍、上嚴重的超出三倍外。 因為中國東北遼寧省最近霧霾嚴重,每立方公尺PM2.5突破1155毫克,真濟台灣人隨時想講是中國外銷來台灣的空氣污染。Chit遍有錯怪中國,因為環保署認為chit站的空氣污染以境內污染源為主。若是空氣污染是ùi中國飛來的,咱一點仔辦法都無;既然是「境內污染源」代誌應該加足好解決,chhōe出污染源,用公權力強制伊改善,若無改善會使罰錢抑是勒令停工。環保署認為境內污染源是汽機車、工業區排放。那像干單台中火力發電廠知影家己m̄-tio̍h niā-niā,自動減少發電、減輕空氣污染。Che mā莫怪,三十年前興建的台中火力發電廠燒火炭的tio̍h有十套機組,是台灣發電量上大、mā是世界第一大的火力發電廠。全台灣猶有幾十間規模大小不等的發電廠,敢m̄免利用chit-ê機會檢驗檢討?其他的工廠那會攏惦惦無出聲?導演柯一正講「污染那像thàn烏心錢」,伊直接點名台塑的六輕。政府敢免有小小的動作?   十月三十一,中南部的民眾拚起來台北抗議,因為in佇PM2.5 hiah呢懸的環境中生活那像活佇「毒氣室」裡,in有看tio̍h血的月娘、in khuh-khuh嗽、he-ku喘、流鼻水、目睭會疼、喘氣bē爽快,有時喘氣艱苦kah beh死。世界衛生組織講kah koh khah嚴重,講若定定呼吸懸濃度的PM2.5,會有致癌症的可能。環保署表示,主要是因為最近台灣氣候khah穩定、風力khah細、空氣污染物無法度消散去,繼續累積才會造成PM2.5濃度偏懸。中央氣象局講,鋒面若來報到,北部有可能會落雨、koh風速若增強、空氣品質會漸漸變好。 若是政府無作為,明知影污染源是啥,卻無beh要求污染源改進、放hō͘爛。若是歹運東北風鋒面無來、風速無變強變大、雨落無落來。Che那像古早做田人講「看天食飯」,咱現此時的台灣人煞變作「看天喘氣」。 台灣政府m̄知知bo͘,台灣人teh beh bē喘氣ah!
 
< Prev   Next >