首頁 arrow 綠色短評 arrow 疼,才有法度化解仇恨kah驚惶!

疼,才有法度化解仇恨kah驚惶! PDF Print E-mail
Written by 李南衡   
Tuesday, 01 December 2015
十一月十三「烏色拜五」,恐怖分子佇法國巴黎kah近郊發動連續恐怖攻擊,至少132人死亡、350人輕重傷,引起全世界大驚惶。法國總統命令戰鬥機去轟炸「伊斯蘭國」(IS)佇敍利亞境內的基地,koh派歐洲唯一的航空母艦駛去地中海,十一月二三,戰鬥機頭一遍ùi航空母艦起飛就近轟炸「伊斯蘭國」(IS)。 佇法國境內充滿反“Muslin”(咱所講的回教徒)的聲音,法國人敢無想講佇法國境內有佔法國人口7%、將近五百萬的“Muslin”,in是ùi叼位來的?敢m̄是百外年前法國殖民統治北非各所在所掠來、所移民入來、以及in年久月深所生湠的第二代第三代第四代?In佇法國一直受社會歧視,佇教育、就業、社會福利各方面攏無得tio̍h公平對待。Chit遍因為「伊斯蘭國」所發動的恐怖攻擊者是“Muslin”,真濟法國白人佇充滿仇恨、驚惶的氣氛下面,tio̍h kā所有法國境內的“Muslin”看作敵人,按呢敢有道理?   十一月十七,佇巴黎的「共和國廣場」有一位男性的“Muslin”,家己用圍巾kā目睭包起來,佇伊的腳前囥兩塊紙枋,一塊頂面寫講:「我是“Muslin”,但是我m̄是人所稱呼的恐怖分子。」另外一塊寫講:「我相信你,你敢會相信我?若是相信我,請kā我攬一下。」真濟人圍teh看,久久才有一個人行倚去kā攬一下,第二個行倚去kā攬一下,第三個第四個,一個接一個無停。內底mā有人目屎含leh去kā攬一下。最後chit-ê“Muslin”kā包目睭的圍巾tháu掉kā逐個講:我感謝逐個kā我攬一下。我按呢做是beh kā逐個講,我是一個“Muslin”,但是,並m̄是因為我是一個“Muslin”,tio̍h是一個恐怖分子。我m̄-bat刣人,我mā為所有chit遍受難者的家庭悲傷,我beh講的是,“Muslin”m̄是等於恐怖分子。恐怖分子tio̍h是恐怖分子,in會無緣無故去刣伊m̄-bat的人。但是“Muslin”m̄是按呢,阮的真主禁止阮按呢做。   伊得tio̍h真濟拍phok仔聲,逐個攏知影:疼,才有法度化解仇恨kah驚惶。   2015年七月三十半暝,一位反教育部課綱微調的高職青年,佇伊二十歲生日hit暗燒碳自殺,抗議教育部的橫暴,伊的名叫作林冠華。林冠華?那像bat聽過伊的名。2014年五月二一下晡,台北捷運板南線龍山寺站到江仔翠站中間行駛中,一個二十一歲的查埔學生鄭捷佇車廂內隨機刣人,造成四死二四傷的悲慘事件。歸個大台北的人攏真驚惶、真受氣。五月二四下晡一位高職的查埔學生,夯一塊紙枋,頂面寫講:「咱互相冷淡對待傷久ah!來攬一下,咱互相攬一下!」Chit位高職學生tio̍h是林冠華。伊知影:疼,才有法度化解仇恨kah驚惶。
 
< Prev   Next >