首頁 arrow 綠色短評 arrow 台大校長hō͘咱看tio̍h智識分子的良心!

台大校長hō͘咱看tio̍h智識分子的良心! PDF 列印 E-mail
發表者 李南衡   
2015/12/08, Tuesday
2014年十一月二九台灣九合一選舉,中國國民黨原本有四個直轄市長kah十一個縣市長、選了chhun一都五縣市;民進黨原本有兩個直轄市長kah四個縣市長,選了增加作四都九縣市。中國國民黨得4,990,677票佔40.70%、民進黨得5,830,106票佔47.55%。中國國民黨會使講是台灣有選舉以來輸了上工夫的一遍、輸kah連自我感覺良好的馬英九感覺無啥好、辭掉黨主席。 舊年九合一選舉,中國國民黨會輸kah hiah呢悽慘,原因真濟,像中國國民黨候選人家己講的「大環境」無好-m̄敢講馬政府六年來的施政太差、不得民心;資源分配不公、貧富差距愈giú愈大、引起人民對代表權貴的富二代官二代反感; 中國國民黨大官罵台灣人是皇民後代、引起台灣人真受氣;年初日頭花運動、中國國民黨完全忽視青年人反馬政府過頭傾向中國kah「烏箱」作業;mā無看tio̍h青年人佇網路chit-ê上新傳播上緊的媒體活動。其實上重要的原因是,無分黨派無分地區無分男女老幼,ùi假油、混油、飼料油、毒澱粉一直到phun油的「食安問題」,食kah歸腹肚毒轉化作歸腹肚火燒向馬政府的中國國民黨。   Ùi舊年十二月二九中國國民黨敗選到taⁿ十一個月過了,馬政府佇「食安問題」有做啥物建設性的施政抑是改善?無,攏無。唯一的大消息是,「食安問題」上蓋hông注目的舊年十月hō͘檢方依違反《食品安全衛生管理法》kah刑法詐欺罪起訴,具體求刑三十年的頂新製油公司前董事長魏應充,經過一年的審訊,十一月二七,彰化地方法院宣判魏應充等六名被告全部無罪。全國人民聽tio̍h chit-ê消息干單會tàng「嘩」一聲以外,歸腹肚火koh-khah to̍h! Chit-ê判決,有人怪檢察官無夠認真,有人怪衛服部提供支援資料無齊全,有人怪地方法院法官烏白亂判。Chia-ê敢m̄是攏屬中國國民黨馬英九總統管下的行政院kah司法院嗎?台北市長柯P講了誠好,伊講有關「食安問題」幾年來馬政府那像是「路人甲」(咱台灣話應該講作「無事人仔」)。全國的小百姓敢會tàng按怎?好,明年一月十六一定beh hō͘中國國民黨知影啥物叫作「憤怒的人民」。   聽tio̍h頂新劣油案一審無罪,十二月初一,台灣大學校長楊泮池重砲轟擊,伊講:「絕對bē使hō͘全世界看笑話!若無,台灣會變作烏心食品天堂!」伊講:「咱tio̍h徛出來講NO,家己的國家家已救!」伊希望全國百外間的大學,甚至高中到國小等各級學校,攏徛出來抵制。台灣大學ùi舊年十月tio̍h開始,校園內底kah所屬的單位攏禁止使用、禁止販賣頂新集團的產品。   台灣智識分子的良心無攏hō͘狗咬去,台大校長hō͘咱看tio̍h智識分子的良心!
 
< 前一個   下一個 >