首頁 arrow 綠色短評 arrow 王如玄tang時仔那會烏kah chit款?

王如玄tang時仔那會烏kah chit款? PDF 列印 E-mail
發表者 李南衡   
2015/12/23, Wednesday
舊年九合一選舉的時,無人敢kah馬英九排作夥!啥人想會到馬英九總統tang時仔會烏lok-lok kah chit款,siáng bak tio̍h siáng現爛去。中國國民黨提名的嘉義市長候選人陳以真原本勢面bē-bái堪得涂醒哲掛七塊看板寫講:「投陳以真就是支持馬英九」,陳以真聲勢那像西北雨「直直落」,結果涂醒哲嬴八千外票當選;中國國民黨提名的雲林縣長候選人張麗善輸民進黨的李進勇五萬七千外票,怪對手掛布條寫講:「票投張麗善,就是支持馬英九。」那像雞仔tio̍h災。若講馬英九是舊年的禽流感H5N1,今年王如玄是強幾若倍的禽流感H10N8 中國國民黨總統候選人朱立倫講beh專心拚經濟,需要一個替伊箍勞工、婦女等弱勢的副手,chhōe一個bat關心婦女權益、bat作過馬政府勞委會主委的王如玄。伊勞委會主委任內開千幾萬倩一陣律師告關廠工人,猶無嚴重,上害的是hông piak孔講有買「軍宅」。一開始王如玄講伊有一戶,監察院有調查報告已經還伊清白ah!幾工後hông逼,講伊另外有兩戶是in老母kah小妹的。「軍宅」是政府為tio̍h beh照顧弱勢的有眷無宅的軍人,用國家的土地,開人民稅金六千億所起的住宅,限制厝交了有五年的閉鎖期,若有人買賣轉讓hông查tio̍h由政府收回。王如玄tī閉鎖期間內甚至進前厝猶未起,伊tio̍h出手落去買。續落去改講伊有五戶。民進黨立委段宜康piak講王如玄有買賣過十九戶,王如玄不得已開記者會說明買賣過的干單有十二戶niā-niā,氣死一寡老榮民、有眷無宅的退伍低級士官軍官,認為王如玄明明是食in的肉、吸in的血、齧in的骨。可惡!   中國國民黨副總統候選人王如玄是彰化人,十二月初轉去彰化kā仝黨提名的立法委員徛台,第二工候選人王惠美的面冊頂面有足濟相片,厲害的你按怎chhōe都看bē tio̍h王如玄的身影;另外一位立委候選人鄭汝芬koh khah chhân,歸氣佇伊的面冊頂面kā hit工的行程活動全部刣掉。驚伊、閃伊,走那飛!   桃園市民進黨立委候選人張肇良掛一塊看板寫講:「支持呂玉玲就是支持王如玄」,害藍營的人搖頭講:「出現chit種看板,m̄知beh按怎反擊。」台北市中國國民黨立委候選人林郁芳伊tio̍h知影按怎反擊,白色力量立委候選人林昶佐佇林郁芳的布條下面掛一面布條寫講:「支持林郁芳就是支持王如玄」林郁芳足憤慨罵講:「過頭khia空,食人夠夠!」去告林昶佐譭謗。彰化縣長夫人佇蔡英文選舉工作line群組中,傳一張中國國民黨立委候選人鄭汝芬的相片,邊仔一張王如玄的相片,寫講:「票投鄭汝芬就是支持王如玄」藍營罵講是「抺烏」。   王如玄tang時仔親像馬英九烏lok-lok kah chit款?siáng bak tio̍h siáng現爛去!
 
< 前一個   下一個 >