首頁 arrow 綠色短評 arrow 咱tio̍h懷念、疼惜台灣阿嬤!

咱tio̍h懷念、疼惜台灣阿嬤! PDF Print E-mail
Written by 李南衡   
Wednesday, 06 January 2016
十二月二七,舉行第一遍總統候選人辯論會,中國國民黨候選人朱立倫講伊有一遍去淡水拜拜遇tio̍h一位阿嬤,勸伊一定tio̍h出來選總統,朱立倫應講,我已經有承諾新北市民做好做滿。阿嬤講:你若無出來選(總統),連天公伯仔都原諒你!咱聽了實在真tio̍h驚,一位完全無熟似的阿嬤所講的話,那會大kah kā伊講二十幾遍新北市長會「做好做滿」的承諾準作ùi尻川出來的一陣風?會tàng kā中國國民黨第一遍照民主程序產生的總統候選人洪秀柱阿姨廢掉! 中央研究院院士發起1,668位學者聯署支持「英仁配」,希望in會tàng hō͘台灣行出過去錯誤的政策、chhōe tio̍h未來發展的方向。十二月三十一,民進黨總統、副總統候選人出席「海內外學術界蔡英文、陳建仁後援會」成立大會,前衛生署長李明亮致辭的時講:「無一個人是淡水阿嬤叫阮來的。」千幾位學者攏笑出來。   十二月二七hit工的辯論會,親民黨總統候選人宋楚瑜有提起高雄賣十箍便當賣二十五年的莊朱玉女阿嬤。2015年四月初四舉行告別式,bat hō͘伊照顧過的碼頭工人kah街友趕來送伊,chit中間伊陸續kā伊的七間厝賣掉,莫怪會hông尊稱作「艱苦人的守護神」。另外,佇台東中央市場賣菜的陳樹菊阿嬤,美國《時代》雜誌選伊作2010年上有影響力時代一百大人物第八名。因為伊每工的生活費用無一百箍,儉腸捏肚所儉的錢bat捐一百萬hō͘佛光學院、一百萬hō͘伊的母校仁愛國小成立急難救助獎學金、八年後koh捐四百五十萬hō͘母校仁愛國小起圖書館,十外年來每年佇台東基督教「O-nī-sek-hut兒童之家」捐三萬六千箍作認養三個院童的費用、另外koh捐一百萬hō͘「O-nī-sek-hut兒童之家」。台灣猶真濟親像高雄莊朱玉女、陳樹菊chit款,值得咱尊敬、懷念咱m̄-bat的阿嬤。   十二月二九下晡,佇新北市蘆州有一位阿嬤tiâu佇一個路口、進亦m̄是退亦m̄是,有六位蘆州國中的學生看tio̍h趕緊去kā扶leh過車路,講話中間才知影阿嬤無錢thang食暗頓,六個學生作夥khêng六十箍請阿嬤食一盤炒麵。內底一位王同學的老母拍手機問講是按怎chiah òaⁿ猶未轉到厝,王媽媽知影代誌的經過了後,載in查某子轉去,the̍h床單、保暖的外衫koh買麵包牛奶送去hō͘阿梅阿嬤。事實上,台灣各所在一定猶真濟親像阿梅阿嬤chit款欠人關心照顧的阿嬤。   十二月三十暗,民進黨總統候選人蔡英文佇政見發表會頂面講,伊的「長期照顧十年2.0」beh用指定的稅收,加公務預算,每年三百億至四百億來作長期照顧體系穩定的財源,建立充足的服務供給,未來會tòe老人人口增加來擴大規模。蔡英文講,無論阿嬤住佇位,咱攏beh hō͘每一位阿嬤上好的照顧。
 
< Prev   Next >