首頁 arrow 綠色短評 arrow 中華民國tio̍h滅亡幾遍in才會甘願?

中華民國tio̍h滅亡幾遍in才會甘願? PDF Print E-mail
Written by 李南衡   
Monday, 11 January 2016

1994年台北市長選舉的辯論會,新黨市長候選人趙少康講,che是中華民國kah台灣共和國的選舉,中華民國teh beh毀滅ah!暗示民進黨候選人陳水扁若當選台北市長,中華民國tio̍h會毀滅。台北市民想講͘中華民國毀滅那會chiah簡單,真想beh看中華民國毀滅生作啥款!原本趙少康是beh嚇驚台北市民,無疑誤顚倒變作催票、催台北市民出來選阿扁͘伊當選台北市長。

2000年總統大選,脫離中國國民黨出來競選的宋楚瑜講,陳水扁若當選總統,中華民國tio̍h會滅亡。台灣真濟人相信chit句話緊拚出來投票選阿扁作總統;四年後總統大選,中國國民黨連戰配親民黨宋楚瑜,講民進黨陳水扁若連任總統,中華民國tio̍h會滅亡,台灣人聽信in的話緊拚出來選阿扁當選連任總統。   2014年二月二二,競選連任台中市長的中國國民黨候選人胡志強講,台中市長若hō͘民進黨候選人當選,台中會無去、中華民國mā會無去。台中市民想講若會chiah好?緊拚出來選hō͘民進黨林佳龍當選台中市長;十一月十五,郝伯村講連勝文若落選,中華民國tio̍h會滅亡。兩個掛雙重保證中華民國會滅亡。   2015年七月初四,2016年總統大選中國國民黨總統參選人洪秀柱講,「我bē使講中華民國存在。」Chit句話那像講,我bē使講老王存在,敢m̄是講老王已經過身去ah!中華民國無存在,m̄是滅亡、無是按怎?   2015年十月十八,中國國民黨總統候選人朱立倫講,綠若完全執政(民進黨總統選嬴、立委過半)中華民國恐驚會滅亡。伊用「恐驚」chiah無堅定的話真無氣魄。咱看in中國國民黨總裁蔣介石lōa有氣魄,1950年三月十五佇草山革命實踐研究院演講中,講「亡國」講三遍、講「中華民國已經滅亡」講一遍。   你若注意,講「中華民國滅亡」的攏是in中國國民黨的人,中國國民黨的對手中國共產黨,無人有趣味講chit款話。In實際行動,佇南京鍾山風景區「南京十朝歷史文化園區」內有chhāi十枝石柱,每一枝石柱頂面有一塊石碑,寫每一個朝代的名,像講南唐佇chia建都當時名叫作金陵、西元937年至875年,最後一塊是「中華民國,公元1912年至1949年,建都南京」會使講是一塊墓牌。   佇台灣見若有大型選舉,中國國民黨tio̍h有人會跳出來大聲喝:某某人若當選,中華民國tio̍h會滅亡!古意的台灣人相信in的話,tio̍h拚勢選hō͘某某人,結果某某人當選,中華民國無影滅亡。害真濟台灣人一遍koh一遍失望。   中國國民黨逐遍講「中華民國滅亡」攏講kah hiah認真hiah正經。咱實在m̄知影,中華民國tio̍h滅亡幾遍in才會甘願?
 
< Prev   Next >