首頁 arrow 綠色短評 arrow Chit遍總統、立委大選,想會到kah想bē到的!

Chit遍總統、立委大選,想會到kah想bē到的! PDF Print E-mail
Written by 李南衡   
Monday, 18 January 2016

一月十六,台灣舉行總統、立委大選,真濟代誌咱早早tioh有預料的,像講中國國民黨會大敗、民進黨會大嬴、親民黨宋楚瑜無可能輸kah親像頂遍才the̍h tio̍h三十六萬九千外票niā-niā。因為中國國民執政chit七年外,馬英九總統競選當時所承諾的「六三三」(每年平均經濟成長率6%、失業率3%以下、2016年國民所得美金三萬以上)「黃金十年」、「愛台十二建設」攏總畫佇壁頂。國內經濟一日一日bái、油錢kah電費雙雙起價,無聽tio̍h人民哀父叫母。͘台灣人上bē tang諒解的是歸個政府、歸個台灣經濟,佇烏箱作業下面直直向中國phēng過去。2014年九合一大選,台灣人已經中國國民黨教示過ahin無懺悔無改過。想會到包括朱立倫kah chithông提名的中國國民黨立委候選人,攏哀講「大環境」無好,講明講是馬英九施政太差,背離民意所致蔭的,才會選kah chiah艱苦。

Chit遍總統大選,想會到蔡英文會當選成作台灣第一位女總統,想bē到伊得tio̍h六百八十九萬外票、破紀錄嬴中國國民黨總統候選人朱立倫超過三百萬票。總統大選,干單花蓮縣、台東縣kah金門馬祖外島四個縣無嬴,想bē到的是只有一席立委的花蓮縣是民進黨的蕭美琴、仝款只有一席立委的台東縣是民進黨的劉櫂豪當選;雖然苗栗縣kah南投縣民進黨總統選票有嬴,是按怎各有兩席的立法委員,民進黨the̍h無半席咧?   想bē到的代誌猶真濟,像講新北市十二席立委,頂屆中國國民黨十席、民進黨兩席,新北市新莊區現任立委李鴻鈞退選、由陳茂嘉接班,無疑誤chit遍「八仙落海」chhun羅明才kah林福德兩席。Kah全台灣仝款攏是少年的kā老的幾連霸的拚倒;像講時代力量新北市黃國昌、台北市林昶佐、台中市洪慈庸三位攏當選,三個月前無人敢按呢想;像講頂屆全國第一懸票當選的桃園市立法委員孫大千,chit遍竟然戰輸無黨但是有民進黨支持的趙正宇?啥人想會到台南市的王定宇會tàng the̍h十五萬外票,成作chit遍全國第一懸票的立法委員?一個月前民調,新黨的政黨支持率連1%都無,經過中國國國民黨副主席、chit遍佇基隆代表中國國民黨競選立委的郝龍斌的老父郝柏村講,新黨才是正統藍,中國國民黨立委蔡正元叫逐個tio̍h kā列名新黨不分區立委第二名的邱毅送入去立法院,想bē到chit遍政黨票會tàng懸kah 4%外,雖然無法度推出一名立委,總是in超過3.5% tio̍h 會tang領受政黨補助款,咱納的稅金neh,實在有小可bē爽。   Chit遍民進黨總統、立委攏過半、完全執政完全負責,相信民進黨佇蔡英文領導下,會kā台灣帶向美滿幸福的將來。Che會真辛苦是咱想會到的。
 
< Prev   Next >