首頁 arrow 綠色短評 arrow 壓死中國國民黨chit隻駱駝的最後一枝稻草!

壓死中國國民黨chit隻駱駝的最後一枝稻草! PDF 列印 E-mail
發表者 李南衡   
2016/01/27, Wednesday
一月十六台灣總統kah立委大選,中國國民黨會輸,逐個攏想會到,因為馬英九總統執政chit七年半,伊競選所承諾的政見無一項做到,經濟bái、人民收入kiu水、厝價、食安問題嚴重,不公不義的代誌那像攏是政府teh chhōa頭,台灣人民只好用選票人民無合意的政府ián倒、無盡職的立法委員換掉! 中國國民黨幾粒大頭無人敢出來選總統,立法院副院長洪秀柱跳出來作候選人,伊原本講是「拋磚引玉」,得意忘形煞講「Bē使講中華民國存在」、「一中共表」chit種三八話,朱立倫黨主席緊kā挽掉,換家己落去選總統,引起中國國民黨內部明顯分裂。朱立倫揀王如玄作副總統候選人,hông piak孔伊有買軍宅,頭起先講伊有買一間,變作三間變作有買賣五間koh變作十一間,信用破產以外,上厲害的是一寡所謂的「深藍」眷區的阿姆阿伯,猶真濟人有眷無厝,看伊按呢烏白變輦、氣kah歸腹肚火,鐵票做一遍生銑。中國國民黨選kah無氣無脈。   民進黨m̄-nā總統、副總統候選人chhōa頭南爭北戰,陳菊、賴清德、林佳龍、鄭文燦四都市長,、kah民進黨眾前輩mā是四界去kā立委候選人助選,南北二路猶無夠,koh拚到後山去kā花蓮蕭美琴、台東劉櫂豪助選,甚至拚去kā時代力量三位區域立委候選人助選,歸個氣勢已經夯起來,無嬴mā真困難。   佇韓國發展的歌手周子瑜,伊的公司JYP為tio̍h beh展in“twice”是國際性的團體,三位日本查某囝仔kah周子瑜仝款一手夯家己的國旗一手夯韓國國旗。Chit種相片根本無啥,已經過時佇中國發展的台灣歌手黃安,最近向中國國台辦檢舉的一寡台獨藝人,隨時hō中國有關單位封殺。一月初八,黃安講周子瑜夯台灣國旗,tio̍h出來講清楚。一月十五JYP公司拍一枝周子瑜親身會失禮的影片囥佇網路,伊照稿唸的內容主要是講:「中國干單一個,海峽兩岸是仝一體,我自頭到尾攏以家己是一個中國人感覺驕傲,我作一個中國人佇國外活動的時,因為言行上的過失,對公司對兩岸網友的感情造成傷害,感覺非常非常的抱歉。」Ti選舉前一工播出,全台灣的人攏對chit位十六歲台灣查某囝仔足m̄甘,甚至有人看kah流目屎。逐個受氣的m̄是干單韓國的JYP公司、m̄是干單黃安、m̄是干單中國對台辦,上受氣的是中國國民黨馬英九政府一直騙咱「九二共識」是「一中各表」,騙咱hiah久一暗完全破功。直直beh掠狂的二十歲至二九歲的少年家,拚拚轉去故鄉投票修理中國國民黨,今年全台灣二十至二九歲的投票率74%有夠懸,兩百三十萬選票干單一成選hō͘中國國民黨,一差tio̍h兩百十三萬票。   周子瑜唸hit篇稿,是壓死中國國民黨chit隻駱駝的最後一枝稻草!
 
< 前一個   下一個 >