首頁 arrow 綠色短評 arrow Chit遍總統立委大選關鍵是少年家!

Chit遍總統立委大選關鍵是少年家! PDF Print E-mail
Written by 李南衡   
Monday, 01 February 2016
Chit遍總統立委大選了,有人評論講是老人味保守分裂的中國國民黨,teh kah少年氣活潑團結的民進黨拚總統拚立委,致使猶未選tio̍h知輸嬴,連外國媒體大選前一禮拜按呢講。立委選舉若是時代力量參落去算,差別koh khah明顯。看民進黨kah時代力量立委候選人,那會中國國民黨拚beh連任的立委候選人拍kah東倒西歪?若詳細看in年齡的chengtio̍h bē感覺奇怪。 咱看chit遍拚beh連任hông ián倒的中國國民黨hit二十二位立委,in的年齡鬥起來是1,276歲、平均58歲;民進黨十九位加時代力量三位立委的年齡是1,009歲、平均46歲,平均一位tio̍h差12歲;若是干單時代力量三位當選kah中國國民黨三位落選的立委比較,差koh khah濟,時代力量三位鬥起來117歲、中國國民黨hit三位鬥起來185歲、差68歲、平均起來一位差22歲外。聽講中國國民黨hit二十二位立委beh成立「落選聯盟」,敢bē感覺小可好笑?   其實chit遍每一個政黨攏有想tio̍h候選人年輕化,每一個政黨攏有提名少年家出來選立委,咱看30歲以下落選的候選人,24歲的有兩位、25歲的有兩位、26歲的有三位、27歲的kah 28歲的各有一位。In分屬佇中國國民黨、樹黨、綠社盟、時代力量、台灣獨立黨、中華統一黨、自由台灣黨、和平鴿聯盟,有區域立委、有不分區立委候選人。Chit遍上少年的立委當選者是民進黨新北市28歲的呂孫陵,拍倒中國國民黨拚連任58歲的吳育昇,in兩人相差30歲。   Chit遍總統立委大選,m̄-nā立委候選人年輕化是關鍵,koh khah要緊的是年輕的選民拚出來投票。原本一直hông看作是對政治泠淡的少年家,chit遍投票率竟然有74%,比今年投票率特別低的66.58% khah懸7.42%,實在驚人!咱講的少年家是指二十歲至二九歲,會使講是1987年台灣解除戒嚴前兩年以後出世的,in完全無「白色恐怖」陰影,生出來tio̍h一直呼吸自由民主的空氣,所認同的tio̍h是台灣chit塊土地,in是非分明,對台灣的認同感誠強,有teh追求台灣的主體性。選舉前一工,電視播出一位穿烏衫的十六歲台灣查某囝仔,因為夯台灣國旗佇韓國被迫唸一段向中國會失禮的字稿,台灣人hō͘強權迫害hit種「亞細亞孤兒」的集體記持作一下夯起來,發現中國國民黨所講的「九二共識,一中各表」原來是一個大騙局,真受氣!有230萬的少年家拚拚出來選,干單一成、差不多23萬的人投hō͘中國國民黨。中國國民黨若無徹底反省、改過自新,四年後會koh增加130萬第一遍有選舉權的「首投族」,中國國民黨那有可能翻身咧!   Chit遍總統立委大選關鍵是少年家,後一遍mā是,以後mā攏仝款!
 
< Prev   Next >