首頁 arrow 綠色短評 arrow 咱佇台南看tio̍h滿滿的愛心!

咱佇台南看tio̍h滿滿的愛心! PDF 列印 E-mail
發表者 李南衡   
2016/02/16, Tuesday
二月初六、舊曆過年前一工透早三點57分,發生一場規模6.4的地動,震央佇高雄市美濃區,嚴重的災區竟然是台南市,各區攏有大小災害,上嚴重的是永康區永大路二段的維冠金龍大樓,十七樓起的大樓分作九棟、成作「ㄇ」字形,有一層地下室、一二三樓是商店區、四樓以上才是住宅區,差不多有九十外戶、兩百外人teh住。九棟大樓有兩棟倒了疊(tha̍h)作夥,ùi倒去的柱仔kah壁有看tio̍h沙拉油桶仔kah pho-le-long枋,新聞報導鐵筋用無一半,一看tio̍h是一大座偷工減料的豆頭(中國話叫作「豆腐渣」)建築。 台南市政府tī透早四點半設立一級災變中心、賴清德市長四點外趕到現場指揮救災,行政院長張善政七點外趕到、馬英九總統坐空軍一點專機九點半趕到,有四百外位國軍、本市kah各縣市趕來的警消救難隊特搜隊teh救人。   過年暗,本地的警消拍手機仔轉去厝裡,「爸爸無閒thang轉去圍爐,爸爸佇chia食便當。」有人送炒飯kah雞湯、有人送牛肉湯、筒仔米糕kah排骨酥湯、有人送咖啡來救災現場hō͘救災人員kah災民食一個燒。若有人假作災民beh按怎?一位頭家講:甘願hō͘一百個假災民食去、mā bē使hō͘一個災民餓tio̍h腹肚!救災人員有人thiám kah坐leh、抑是phēng佇壁邊tuh龜;有真濟商家提供店面hō͘救災人員小息睏一下,旅館、民宿、飯店提供房間hō͘災民住。台中市政府表示,佇豐原有新都、五都、西悠三間大飯店願意免費提供部分房間hō͘災民住,另外有幾間旅舘願意特別價數接待災民、台中市政府答應交通局負責派車載災民。   嘉義市義勇特搜隊隊員蕭廷宇鑽入去倒落變形的大樓內底,聽tio̍h呼叫的聲,一名查某人hō͘落落(lak-loh)來層層疊疊的壁角鐵片隔離,伊用探照燈照tio̍h一枝手,特搜隊隊員一直用話安慰伊:「我koh拚一下,請你koh忍耐一下!」三點鐘後才kā伊救出來,好該哉猶有法度家己行路。大樓已經變形,佇東倒西歪的建物內底,警消叫一位褪赤腳的查某囝仔災民peh窗仔出去,歸土腳攏是碎石仔kah玻璃,伊問警消beh按怎peh起去,警消跪leh身軀覆佇土腳講:「踏我的身軀peh起去。」伊peh起去窗仔門隨時有一位警消kā伊 āiⁿ出去。   台南市長賴清德無暝無日佇現場指揮,過年暗kah新科立委王定宇佇指揮中心食一碗滷麵算作圍爐,而後坐佇椅仔小tuh一下。伊的目睭牽血絲、布鞋穿kah頭前開嘴teh笑,人叫伊小息睏一下,伊應講作醫生輪大夜班慣勢無問題,有網友氣kah佇面冊頂面警告賴市長:你若無beh小息睏一下,阮後遍無愛支持你!   咱佇台南看tio̍h chiah濟天使,看tio̍h滿滿的愛心。
 
< 前一個   下一個 >