首頁 arrow 綠色短評 arrow 語言是一個民族的生命根!

語言是一個民族的生命根! PDF 列印 E-mail
發表者 李南衡   
2016/03/01, Tuesday
二月中,香港拄拄結朿一個「更新中國語文教育學習領域課程(小一至中六)」公眾諮詢文件中tio̍h有提起「學生佇掌握繁體字了後,mā tio̍h應該具備認識會讀簡化字的能力。」要求中小學生學習認識kah會曉讀簡體字。若是kah 2008年香港政府開始拚勢beh推行用普通話教中文(簡稱「普教中」),引起一片推行普通話廢除粵語(廣東話)的爭議。會使看出中國中央政府用心良苦,一直beh推行佇小學六年到中學六年上課用普通話教學,另一方面加強簡化字的推行,雖然猶真客氣、敢明講beh廢掉繁體漢字。真濟人知,佇香港kah廣東省各級學校的教學一直是用廣東話,中國政府干單希望佇中國語文教學的時會tàng使用普通話(咱台灣所講的「國語」)上課。按呢你tio̍h知影幾十年來中國國民黨政府佇教育上欺侮台灣人欺侮kah偌過分! 佇香港,講廣東話、寫正體字tī過去一百七十年來攏無斷過,就算是英國殖民統治時期,英語一直是法定語言時期,廣東話猶原逐個香港人所普遍使用的。甚至1997年回歸中國了後,香港官方的語言廣東話已經取代英語地位;香港會使講是kah台灣兩個上堅持使用正體字的所在,其他包括新加坡、馬來西亞、美洲各所在的華文報紙雜誌書刊,攏加減有透濫tio̍h一寡簡化字,甚至有的歸個攏已經簡體化去ah!   香港上大的電視台無線電視最近推出新台J5,tī暗時八點半黃金時段播出的全部是普通話,字幕所配的全部簡化字,有人看了感覺那像是teh看中央電視台。問題是伊有資金、人力,節目內容若漸漸改好,香港人慢慢仔tio̍h會收看。你完全無伊法。   Chit幾年來,香港政府一直tehe執行中國中央的政治任務,拍拚推行普誦話kah簡化字,主要是beh推動kah加強加快香港kah中國之間的融合,事實上是為tio̍h beh hō͘簡化字kah普通話早一日普及化。真可惜香港政府完全忽視香港的地方性,囝仔學習上好是用母語,一個地方一個族群上寶貝的是伊的文化。二月初八新正暗時,香港旺角取締食攤仔,引起「本土民主前線」二十外歲青年出來維護食攤仔,in認為政府thiau工取締過年時仔的食攤,是beh消滅香港的在地文化。ùi暗時十點半一直kah警方對削到第二早起九點,警方幾遍使用催淚彈,青年佇路口四界放火燒。受傷的超過一百三十人、hō͘警方掠去的超過六十四人。   一個獨裁者講:「Beh消滅一個民族,tio̍h先瓦解伊的文化,beh瓦解伊的文化,tio̍h先消滅伊的語言。」按呢,咱tio̍h知影語言是一個民族的生命根!
 
< 前一個   下一個 >