首頁 arrow 綠色短評 arrow 其中必有緣故!

其中必有緣故! PDF 列印 E-mail
2009/01/09, Friday
        中國國民黨籍立法委員李慶安hong5懷疑有雙重國籍,伊辯解講,佇一九九四年當選宣誓就任台北市議員e5同時,伊原本有e5美國籍就自動失效去ah!真濟有theh8過美國籍e5人及佇美國做律師e5人講,美國護照及永久居留證(綠卡)有可能過期失效e5問題,但是美國國籍及永久居留權仝款,無hit號「自動失效」e5可能。一定tioh8本人去美國駐外領事館填寫表格、經過法定程序宣布放棄、抑是入境美國時受移民法庭e5審判違法ka7取消。若m7是按呢,無人會tang3剥奪任何一個美國公民抑是永久居留者e5權利。

        立法院民進黨黨團堅持講無「自動失效」hit號代誌、tioh8查,及中國國民黨黨團相諍幾個月,最後中國國民黨才同意要求每一位立委攏tioh8簽同意書,hou7外交部去向美國國務院查看有to2一位立委有美國籍。獨獨一位李慶安委員m7簽,拖拖拖,一拖koh拖幾個月,到路尾無簽be7使得才勉強簽名。

        等外交部收tioh8美國國務院e5回函,外交部講是秘密文件be5使公布,偷偷交hou7立法院。經過民進黨及輿論批判koh舞幾工,最後才ka7美方回函交hou7每一位立委,咱才知回函講李慶安確實有美國籍,而且無放棄美國籍e5紀錄。按呢敢無夠清楚?民進黨要求馬上撤銷李慶安e5立委職務,偏偏中國國民黨團坦護李慶安,講tioh8等李慶安講e5一月底美國國務院會ka7審查結果回覆才來處理。逼逼逼、逼到李慶安宣布退黨,中國國民黨ma7 koh用黨政協商e5垃圾步ka7 chit-e5案冷凍一個月。hou7咱攏想be7曉,是按怎中國國民黨chiah呢衛李慶安?是按怎外交chiah呢顧伊?是按怎地檢署拖chiah久攏無辦伊?

  台灣教授協會及一寡民間團體決定一月初九beh去圍立法院,初八下晡李慶安趕緊宣佈辭掉立法委員職務,伊講是因為伊不忍心看tioh8e5案件hou7人利用來綁架總預算,引發國會衝突,製造社會紛擾。一個講白賊面攏be7紅、涉嫌欺騙選民十五冬、涉嫌不法取得公職所得一億外e5人,講tioh8假那是「民族英雄」抑是啥物「聖女」咧!伊敢m7知伊害中國國民黨滿面全豆花?那像中國國民黨黨團書記長張碩文所講e5,李慶安是ka7阮準作狂e?抑是siau2-e5?咱實在想無,李慶安那有本事拖三百0三工?中國國民黨、外交部、地檢署,那會一直thin7李慶安thin7chit款,in到底有啥物講be7出來e5苦衷?

囝仔時陣去看歌仔戲,戲中有啥奇怪、不可思議e5代誌,小生攏會思考歸晡才講:「其中必有緣故!」邊仔e5丑仔攏會thiau工改講:「我看ma7是『機關囥佇倉庫』!」咱tioh8好好來看,到底是啥物機關chiah呢神秘囥佇倉庫?

 
< 前一個   下一個 >