首頁 arrow 綠色短評 arrow 蔣介石,按呢歹看la̍h!

蔣介石,按呢歹看la̍h! PDF 列印 E-mail
發表者 李南衡   
2016/03/07, Monday
最近十外年,台灣出現一個真奇怪的現象,是蔣介石的生日、mā m̄是伊作忌的日,每年二月二八,全台灣各所在攏有人蔣介石銅像掠出來暴辱一下、弄弄一下,而且那像一年比一年khah鬧熱。 今年,中興大學校園內的蔣介石銅像hông噴紅漆,底座hông貼「殖民者、殺人魔」的字條,校方歸個用塑膠帆布包密密。學生kā幾張相片po佇網路頂面,隨時有人反應講:請按呢包leh tio̍h好,永遠免拆開。台中教育大學台語系副教授楊允言kā學生說明二二八事件kah台中教育大學前身台中師範的關係,真濟老師kah學生受迫害。伊講:佇咱校園內底有蔣介石的銅像teh kā你睨(gîn),是台灣人的悲哀、mā是台中教育大學的恥辱!伊指導學生kā蔣介石銅像貼kah滿身的標語,頭貼:「我是殺人魔王」、胸前貼「還原史實、實現正義」,雙腳貼「徛傷久,腳會麻」koh有用羅馬字注音。伊希望mài罰蔣介石徛傷久,早一日kā伊遷走。輔仁大學kā蔣介石銅像的頭噴紅漆、打扮作一隻嘴尖尖的Malaria蚊,講是威權統治比Malaria khah恐怖,身軀幔一領蚊罩。苗栗市舊苗栗農工停車場的蔣介石銅像,歸身軀hông潑紅漆,銅像掛一寡字條:「莫忘二二八」、「殺人兇手」、「認罪」。有人認為蔣介石銅像是古蹟無應該破壞,隨時有人反駁講:「殺人犯去人兜刣人,koh佇人門口chhāi一身伊的銅像,he是啥古蹟?」政治大學總圖書館的蔣介石銅像,歸身軀貼kah攏是二二八受難者人名,校方腳手真緊,先kā hiah-ê人名liah掉,才歸個用烏布蓋起來,那像是「bē見得眾」,相片一下佇網路流傳,有人滾笑講「蔣介石hông蓋布袋ah!」「陽明大學有意思社」在面冊頂面發起連署活動,呼籲拆除校園內的蔣介石銅像,落實轉型正義。無像舊年kā蔣介石噴紅漆、kā裝作小丑仔、佇底座貼一大堆二二八受難者的相片kah簡歷。   講tio̍h舊年,佇全台灣各所在的蔣介石銅像mā無khah好過日。北一女校園內的蔣介石銅像的頭hông蓋糞埽袋仔、寫「殺人魔」三大字;基隆獅球公園蔣介石銅像頭hông刴掉chhōe無,變作一個「無頭公案」。   2015年二二八追思紀念會致詞的時,台南市長賴清德宣布全市國中國小十四座蔣介石銅像,預定全部遷去桃園慈湖;四月三十,嘉義市長涂醒哲kā市府管轄的兩座蔣介石銅像徙去桃園慈湖,另外九座銅像會邀請各相關單位來討論按怎處理khah好。咱希望所有有權利決定按怎做的主管,攏會tàng像賴清德市長、涂醒哲市長好好處理。若無,蔣介石銅像逐年都會hông kā裝siáu創治。   咱真愛kā chit-ê二二八大兇手講:蔣介石,按呢歹看lah!
 
< 前一個   下一個 >