首頁 arrow 綠色短評 arrow 政府變烏道,人民beh走叼?

政府變烏道,人民beh走叼? PDF 列印 E-mail
發表者 李南衡   
2016/03/11, Friday
三月初五,一位魏小姐佇PPT網站發文講,伊的老父有收藏幾份白色恐怖時期的文獻.有人拍電話來講beh買普洱茶,二月十九雙方約佇捷運蘆洲站車頭外口見面,一下見面,對方表明是憲兵隊人員,八九個人ùi兩台車chông出來叫伊上車,另外一個人去騎伊的o-tó-bái。先載魏先生去憲兵隊二樓簽寫一大堆文件了,才載伊轉去厝裡the̍h伊佇網路買了beh佇網路拍賣的三張白色恐怖時期的文件。koh叫伊tio̍h簽一份「自願受搜索同意書」,講「若無配合會真歹看!」了後koh押魏先生去憲兵隊偵訊到暗時十點外才放伊轉去,魏先生家己轉到淡水厝裡已經半暝十二點。佇憲兵隊有人用台北憲兵隊的名義開一張扣押物品收據,頂面寫偵辦「贓物罪、妨害秘密」的案件,依法扣押相關文件。三月初國防部the̍h一萬五千箍去͘魏先生,叫魏先生使對任何人講chit件代誌,魏先生拒絕收,因為伊he是啥物錢,國防部講是「獎金」、魏先生認為是「封口費」。 咱有幾點疑問m̄知啥人會tàng解答?憲兵隊聲聲句句講in有司法警察的身份,借問一下,司法警察beh入去平民百姓的厝,敢m̄免先報向檢察官立案偵辦而且聲請搜索票?若有檢察官發的搜索票,何必叫人簽啥物「自願受搜索同意書」,那像是烏道的作法,立法院應該早一日廢掉chit種被逼所簽的「自願受搜索同意書」。古物網拍賣公司「再生.com」胡顧問講,伊手內猶有千外份白色恐怖時期文件,希望國防部主動kah伊連絡。魏先生he三件文件就是公開佇網路頂面向「再生.com」買的,那會是啥物「贓物」咧?準若是「贓物」,mā是應該去chhōe一直佇網路頂面賣一寡「古物仔」、而且手底猶有千外張白色恐怖時期文件的賣主才tio̍h。照2003年制定的《國家機密保護法》,機密文件三十年後tio̍h重新公告,魏先生手裡he三份文件是1960、1970年代的文件並無重新公告,算作是已經「解密」。借問憲兵隊he三份文件到底「妨害」tio̍h啥物「秘密」咧!而且國防部敢免檢討,是按怎當年的秘密文件無銷燬、會流落佇民間咧?敢免先查叼一個單位有失職?那會使chhìn-chhái掠一個無辜的人民來抵數?國防部軍安總隊那會使佇chia導演兼演員咧?應該負啥物責任?   一個小百姓無代無誌hō͘憲兵隊用「釣魚仔」的方法騙出去,八九個憲兵chhī徛來押你坐車去憲兵隊寫口供,才koh去你的厝the̍h文件,你會驚bò͘?你會驚kah tio̍h食安眠藥bò͘?Koh khah欺人太甚的是,三月初一,憲兵用chit種無可能成立的理由去士林地檢署告魏先生。賊khah惡人!   政府變烏道,人民beh走叼?
 
< 前一個   下一個 >