首頁 arrow 綠色短評 arrow 教官猶佇校園創啥!

教官猶佇校園創啥! PDF 列印 E-mail
發表者 李南衡   
2016/03/21, Monday

今年二月二六,政治大學學生團體「野火陣線」學生佇校園內的「風雨走廊」貼有關二二八事件的海報,照政大課外組規定,政大教學行政單位kah學生佇「風雨走廊」會使自由貼海報、免申請。當學生佇hia貼海報的時,卻遭受tio̍h政大主任教官張惠玲到現場海報liah liah掉。學生問講:你是啥人敢liah阮的海報?張惠玲主任教官應講:我那tio̍h回答你的問題?引起學生強烈抗議,要求校長出面道歉。拖到三月初四,政大「野火陣線」佇圖書館前召開記者會,要求校方為二月二六粗暴行為公開道歉。校方佇記者會尾聲有派出學務部副主任代表出面道歉。校方表示chit幾日校方開過幾遍還原真相會議,主任教官張惠玲攏有表達歉意,「張教官才來政大五個月,無啥瞭解規則。」Che算是啥理由?若是一個學生犯ti̍ioh校規,敢使會講我ta-á入學五個月無瞭解校規.tio̍h免受處罰?

  Ùi chit-ê事件,惹起逐個koh一遍思考教官佇校園的問題。   中國國民黨政府佇中國大陸一直有佇校園內設軍事訓練教官,1949年走路來台灣,1951年開始恢復軍事訓練教育,先ùi八間讀公費的師範學校試辦,第二年蔣經國主持成立「中國青年反共救國團」,順勢kā軍訓教官捒入去高中以上的學校,hit陣白色恐怖時期無人敢講半句話。1960年才kā軍訓教官任用kah管理權ùi國防部徙去hō͘教育部。當時逐個mā攏知影,中國國民黨政府是為tio̍h加強對校園的掌握控制,才硬kā軍訓教官捒入去校園,去監視、審查、控制學生kah教職員的思想、言論、行為,卻藉口講是為tio̍h國家安全、防止共產主義滲透,事實上是大大侵犯tio̍h學生kah教師的自由、教學自主kah校園自治。   雖然解嚴了、甚至2000年政黨輪替了,但是因為立法委員猶原是中國國民黨佔多數,一直無法度立法廢止校園內的軍事訓練教官。講起來真落氣,全世界那有一個民主國家像台灣,佇高中以上的學校設置軍訓教官?足無簡單才tī 2013年修正「高級中等教育法」的時附帶決議ùi 2014年開始八年內(也就是2021年進前),當時有的三千五百名教官tio̍h全面退出校園。中國國民黨立法委員呂玉玲講,教官對維護校園安全有伊的必要性,建議教育部應該維持校園內的教官配置,mā有人講教官留佇校園的任務是輔導學生。講chit種話的人明明是頭殼貯糊仔,校園的安全應該由專業的警衛、安全人員負責,輔導學生的工作應該由專業的輔導人員來處理,軍事訓練教官有啥物輔導學生的專業知識kah訓練咧?   軍訓教官早一日退出校園早一日好,若無,若koh出現一個像政治大學主任教官張惠玲hit款人的時,咱一定會問講:教官猶佇校園創啥!
 
< 前一個   下一個 >