首頁 arrow 綠色短評 arrow 見笑死的馬英九,你轉來ah ò͘!

見笑死的馬英九,你轉來ah ò͘! PDF 列印 E-mail
發表者 李南衡   
2016/03/29, Tuesday
總統任期chhun兩個外月的馬英九,硬三月十三至十九去中美洲的瓜地馬拉(Guatemalakah貝里斯(Belize)訪問。外國媒體批評伊chit chōa中美洲的「久安之旅」令人費解,意思是講「知意思」。阮認為伊chit chōa「畢業旅行」歸個行程是「見笑死」的旅行。 頭一項,伊答應幫助瓜地馬拉基礎建設,合作計劃「CA-9號公路」第一、第二階段工程已經完成,第三階段拓寛工程搶tī舊年十二月十五動土,chit條會通到大西洋、未來beh通到加勒比海的瓜國交通大動脈的工程kah計劃,伊講會由台灣的新政府來快速完成;另外一項,因為台灣的肝臟移植技術世界出名,有幫助瓜國tī 2013年九月成立肝臟移植中心,但是基礎設施有問題致使一直無法度啟用。莫拉雷斯(Morales)總統提出時程,希望今年內會tàng啟用,馬英九隨時答應講續落去會由台灣未來的新政府處理。伊公開向瓜地馬拉媒體強調chiah-ê合作計畫攏會tàng繼續落去做到完成,並m̄是新總統攏tio̍h照我所講的去做,伊若認為無好伊mā會使決定停止。Teh beh落任的總統佇外國烏白開支票,新總統若無照按呢做,馬英九的面beh夯去叼?實在是見笑死。   1990年代中美洲內戰動亂結束了後,tī 1993年建立「中美洲整合體」、成立「中美洲議會」,成員國伯利斯kah哥斯達黎加兩國拒絕參加議會,台灣m̄知啥意思作該組織的域外觀察員。章程hō͘會員國卸任的正副總統兩人作「當然議員」,享受kah各國選出的二十名議員、二十名副議員仝款免hông起訴的特殊豁免權,成立二十外年來,因為有議會議員利用免檢查車輛越界運送毒品,甚至佇議會抄出毒品交易,巴拿馬三位卸任總統利用豁免權逃閃貪污刑責,致使「中美洲議會」有「賊巢」的臭名。馬英九去hia演講都已經是見笑代ah,議會佇網站頂面貼出歡迎「中國-台灣總統」,馬英九講按呢稱呼無啥m̄-tio̍h,實在是見笑死。   馬英九總統出訪期間,佇飯店僑宴頂面,伊人坐歪歪,專機的空中小姐一個一個行過伊的面前,那像唐伯虎teh點秋香,按呢猶未過癮,起去台仔頂kah專機的空中小姐手牽手跳舞,唱:「阿里山的姑娘美如水呀」足無體統、mā見笑死!   中國趁伊佇中美洲訪問,宣布kah非洲的甘比亞建交,明明是kā馬英九搧嘴phóe,伊m̄敢對甘比亞受氣,不敢遣責中國、干單講中國按呢對兩岸長期以來建立的互信真不利,表達強烈不滿。民進黨立委問講馬英九tā-tā叫的「外交休兵」tio̍h是按呢是bò͘?馬英九轉來煞大罵民進黨是「看別人落難家己偷歡喜。」Chit款的總統已經無法度用「見笑死」來形容,因為伊根本是bē見笑!
 
< 前一個   下一個 >