首頁 arrow 綠色短評 arrow 香港的少年人覺醒lo̍͘h!

香港的少年人覺醒lo̍͘h! PDF Print E-mail
Written by 李南衡   
Thursday, 31 March 2016
最近出版的香港大學學生會刊物《學苑》,上蓋受注目的一篇文是〈咱的二零四七〉,文章內底明確表示:「(1997年)《中英聯合聲明》中承諾香港五十年變的期限teh beh tī 2047年屆滿。」《學苑》對香港前途問提出三項訴求:「香港成作聯合國認可的主權獨立國家、建立民主政府、全民制定香港憲法。」親北京的香港《大公報》講是「煽動港獨」,香港特別行政區行政長官梁振英回應講,《基本法》記明香港是中國的一部份,「五十年變」是講香港的資本主義制度kah生活方式,將來無需要變、無應該變。 香港大學出版chit期《學苑》的主題是「香港青年時代宣言」,大學二年的副總編輯陳凱螢講,阮感覺傷濟人kā焦點下佇chit篇〈咱的二零四七〉。其實《學苑》所發表四十外頁的「香港青年時代宣言」應該看作一個整體。「阮對香港的想像m̄是干單獨立抑是無獨立,阮有想到每一個角度,像講教育、環境等等,攏會tàng比chit-má khah好。我感覺香港人有能力家己辦一場公投,慢慢行向獨立。」另外一位副總編輯江曼諺講,香港人爭取真普選、2014年九月二六到十二月十五佔領中環七十九工的「雨傘運動」是一個轉折點,hō͘群眾覺醒《基本法》kah《中英聯合聲明》已經無法度保護香港。所以獨立、自決的呼聲愈來愈大,香港自決的意識mā會愈來愈強。今年舊曆過年新正暗到\初二早起八點的「旺角騷亂事件」,徛出來保護食攤仔hông以「暴動罪」罪名掠去的「本土民主前線」發言人梁天琦,代表「本土民主前線」參選立法會新界東地方選區二月二九的補選,喝出「光復香港,時代革命」的口號。雖然以第三懸票落選,但是the̍h tio̍h 15%、六萬六千外票,是向政府證明,支持「本土派」並m̄是「一小撮仔人」,「十年電影工作室」獨立製作的電影《十年》tio̍h是足本土的。   《十年》teh講五個香港故事,一個故事製作費干單會tàng開十萬港幣(約新台幣四十一萬),因為所有的經費干單chiah濟。Ùi舊年十二月十七上映到今年二月十二結朿,佇香港大轟動、本地票房收入五百四十萬港幣。《十年》teh問香港人你對十年後的香港有啥想法?《十年》內底的〈\自焚者〉講一個為爭取香港民主hông掠去關,絕食死佇監獄的青年;〈方言〉描寫普通話(咱講的「國語」)kā廣東話kheh kah無生存的空間;〈浮瓜〉描寫中國政府安排殺手佇香港製造動亂順勢來推行「國安法」;〈本地蛋(卵)〉teh講本地的創意產業、食品等的生存空間愈來愈細。本片得tio̍h 2016年香港電影導演會年度大獎。     香港真濟少年人已經覺醒lo̍h,台灣猶有真濟少年人teh睏咧!
 
< Prev   Next >