首頁 arrow 綠色短評 arrow 「十年」的拍拚‧「十年」的啟發

「十年」的拍拚‧「十年」的啟發 PDF 列印 E-mail
發表者 李南衡   
2016/04/11, Monday
今年(2016)四月初三,第三十五屆香港電影金像獎頒發「最佳電影」͘獨立電影《十年》,真濟人大驚一tiô。原本外界認為chit部討論香港回歸中國了後的政治、社會kah文化敏感議題的電影,連入圍都真困難,那有人敢想講會得tio̍h chit項榮譽。金像獎主席爾冬陞決定伊親身頒chit-ê獎。 1997年香港回歸中國到taⁿ二十年,當時中國有承諾香港五十年bē變,真濟香港少年人會煩惱,bē-tàng無思考koh三十年2047年一下到,香港會變作啥款?有一陣少年人思考koh-khah近的問題-十年,in推想十年後香港可能會拄tio̍h的問題,分作五大主題,因為in無錢、干單有五十萬港幣niā-niā無可能拍一部大型的影片、只好拍作五個短片。無兩個月的時間,放映收入超過五百外萬港幣,為tio̍h beh hō͘ khah濟香港人思考家己的將來、十年後可能面臨的問題,in隨時決定去各社區、校園免費公演,三十外場中間上少的觀眾只有五六十個人,上濟人的一場有三千外人欣賞。三月二十,佇東區泛民會議十位議員佇柴灣青年廣場舉行「十年座談會」,除了欣賞影片koh有kah導演對談,吸引六百外人來參與。四月初一,舉辦「十年‧四月初一‧同步」活動,五十個團體佇香港九龍新界三十四個地點同步放映《十年》,了後一點鐘的座談會,採取網上直播的方式kah導演對談,hit暗有六千名市民佇無仝的地點作夥欣賞《十年》。咱台灣幾十年來各種民主運動、環保運動等各種運動,敢有人拍出影片,去各社區各校園宣揚理念?無。Chit點咱khah輸人。   五部短片內底有一部《方言》,探討十年後,中國政府kā普通話(咱講的「國語」)定作香港唯一的官方語言,而且立法規定所有的香港「的士」(咱講的「計程車」)司機攏tio̍h通過國家語委普通話水平測試,無通過的司機tio̍h佇車頭車尾貼「非普通話的士司機」的標仔,而且bē使佇各大機場碼頭載客。一個四十外歲的阿漢學bē會普通話,只好佇伊土生土長的地區求生存,市面上無論是學生、人客、茶餐廳服務人員、甚至連學校的廣播攏總是普通話,自細漢tio̍h一直teh講的母語hông叫作「方言」,伊除了感覺「討賺」愈來愈困難以外,伊mā發現失去真濟真濟。佇台灣,中國國民黨政府禁止各族的人講母語,強強推行in講的「國語」,咱台灣各種母語攏變作「方言」,學生囝仔bē曉母語,致使孫仔kah阿公阿嬤講話bē通,咱台灣人敢有hng一聲?Chit點咱mā khah輸香港人。   「十年」chit部電影m̄-nā引起真濟香港人思考家己的未來、安慰逐個chit-má有十年thang思考猶bē傷慢,mā引出真濟香港人的目屎直直流。
 
< 前一個   下一個 >