首頁 arrow 綠色短評 arrow 中國講:你請,我無閒!

中國講:你請,我無閒! PDF Print E-mail
Written by 李南衡   
Monday, 18 April 2016
2014年底,東非肯亞(Kenya)警方破獲一個華人詐騙集團,今年四月初五當地法院判決其中二十三名台灣人無罪,初八,中國向肯亞施壓強強掠八名台灣人遣送去中國北京羈押。台灣外交部講中國是「非法掠人的不文明行徑」,四月十一,馬英九總統主持「兩岸kah國際小組會議」裁示,要求陸委會持續kah中國溝通,要求中國盡速放人。目前猶有咱國的人留佇肯亞,相關單位應密切注意,確保咱國的人bē koh hō͘中國強強掠去的代誌發生。話講猶未煞,中國佇肯亞koh kā十五名判無罪的台灣人,kah新掠tio̍h另位一件詐騙案的二十二名攏總三十七名台灣人,強強押送去機場載去中國。根本馬英九總統講的話準作放屁! 原本馬英九總統ta-ta叫的兩會「熱線」幾nā工冷ki-ki bē通,四月十二暗忽然間koh「熱」起來會通ah,台灣陸委會主委夏立言kah中國國台辦主任張志軍講五十外分鐘的電話,夏立言表示,初八中方的作為,無顧tio̍h雙方的共識,「嚴重傷害兩岸八年來所建立的互信,我方再次表達抗議。」伊提出五點具體主張,包括照兩岸司法互助協議規定進行人身安全限制通報、我方盡速組團去中國協助處理而且探視受押人員,中方應盡速送回受押的四十五名我方民眾、請中方積櫪安排家屬去中國探視、kah雙方盡速討論按怎合作打擊跨第三地電信詐騙犯罪常態處理方式。張志軍太極拳拍kah足súi,伊講伊會向大陸有關部門轉達。伊講台灣電信詐騙嫌犯佇海外設立據點,詐騙大陸民眾「屢禁不止,愈演愈烈。」必須法辦。張志軍完全bē記得早前所建立的「東南亞合作模式」:對岸同意暫時擱置主權、司法管轄權爭議,針對電信詐騙等重大誇國案件,承諾兩岸會使kā涉案人員「各自遣返己方人員」。   四月十二,中國外交部發言人陸慷針對十五名佇肯亞涉案的台灣人強押去北京,伊講對肯亞堅持「一個中國原則」高度讚賞;中國國台辦主任張志軍koh表示,中國對台方無變,兩岸雙方攏堅持一個中國原則的九二共識。   四月十三早起,台灣陸委會主委夏立言表示,beh爭取三工內組團去中國探視ùi肯亞hông遣送去中國的四十五名台灣人。中國國台辦以文件回應,一開始當然是表示歡迎台灣組團去中國瞭解佇肯亞牽涉tio̍h對中國民眾電信詐騙案的台灣人案情,但是安排探親「有困難」。文件尾段講,中國願意「佇兩岸共同打擊犯罪協議框架下面」進行接觸溝通。但是因為嫌犯拄拄帶回,需要一寡時間,目前恁派員到中國「恐驚有小可無方便。」就是咱台灣話所講的:「你請,我無閒!」
 
< Prev   Next >