首頁 arrow 綠色短評 arrow 咱無加入「亞投行」敢會按怎?

咱無加入「亞投行」敢會按怎? PDF Print E-mail
Written by 李南衡   
Friday, 22 April 2016

四月十二,有關台灣申請加入「亞投行」chit件代誌,「亞投行」行長金立群koh一遍表明立場講,照「亞投行」章程第三條第三款規定:非主權地區,以及bē-tàng對家己的國際事務負責的地區,應該通過伊的主權政府進行申請。也就是照香港澳門的模式、用「中國台灣」的名義向中國財政部申請。中國明明咱台灣看作「細漢的」,財政部長張盛和講連主權都無去ah,對咱的尊嚴有損,「咱無可能接受。」

「亞投行」是「亞洲基礎設施投資銀行」的簡稱,是2013年十月初二中國國家主席習近平佇印尼Jakarta,kah當時印尼總統Susilo舉行會談的時第一遍提起的。當時beh成立「亞投行」的理由mā誠好聽:亞洲有世界一半以上的人口,佔世界三分之一的經濟市場,設立「亞投行」會tàng幫贊亞洲真濟國家的基礎建設,hō͘亞洲的投資開發巿場活起來。2014年十月由當時二十一國簽署備忘錄宣布成立,到taⁿ已經有五十七國kah地區申請成作「創始會員」,咱台灣mā有申請,中國無插咱。2015年「國共論壇」中,習近平主席有講:歡迎台灣用「適當」的名義加入「亞投行」,伊無講用啥物名義。原本「亞投行協定」有講,對「世界銀行」kah「亞洲開發銀行」成員國開放,台灣是1966年「亞洲開發銀行」創始會員,應該有資格以完全會員的身分加入「亞投行」,所以咱tio̍h興chhih-chhih去申請,「亞投行」行長金立群煞講咱是「非主權國家經濟體」,tio̍h向中國財政部申請。消息傳來了,真難得朝野立委攏認為若無平等尊嚴,就無必要加入。   「亞投行」總資本額一千億美金,一股十億。事實上咱若加入,mā無啥可能參與到啥物程度,台灣會有偌濟商機,加入了是m̄是啥物代誌攏tio̍h等中國tìm頭?每一項攏需要專業的評估。台灣一直講咱加入「亞投行」是beh「善盡國際責任」。其實過去三年,咱台灣的銀行佇亞洲地區所投資kah融資的金額tio̍h超過二千億美金,真正有協助真濟亞洲國家發展經濟。美國、日本是按怎無加入「亞投行」咧?主要是美國kah日本擔心「亞投行」的財政透明度kah監督機制無健全,所以無愛加入,中國顚倒講美國真可惜失去機會。   今年四月底,會佇北京開會評估新成員的加入,六月底會確認新成員,會特別關心其他國家申請的信息,佇「尊嚴、平等」的原則下慎重評估後續的事宜。   有人會煩惱,咱無加入「亞投行」敢會按怎?會。咱會減開冤枉錢十億美金,koh m̄免the̍h錢hông開、koh tio̍h看人的頭面,hông看作阿戇仔。
 
< Prev   Next >