首頁 arrow 綠色短評 arrow 中國推捒的「一帶一路」是啥碗糕?

中國推捒的「一帶一路」是啥碗糕? PDF 列印 E-mail
發表者 李南衡   
2016/05/04, Wednesday

四月二五,立法院外交kah國防委員會召開「如何運用全球台商組織協助政府拓展新興市場,因應中國大陸一帶一路(chit-tòa chit-lō͘)政策」專題報告,僑務委員會委員長陳士魁講,中國若藉一帶一路政策,會tàng成功kah沿線國家建立區域合作關係,現此時teh進行的兩岸經貿關係kah產業分工真有可能會嚴重失衡。到時,中國會ùi沿線國家the̍h tio̍h中間產品,而且向in輸出相關產品,衝擊台灣產品去中國kah相關國家的份額,「非常不利台灣整體的競爭力」。民進黨立委王定宇質詢表示,「一帶一路」初期的基礎建設是由中國政府kah國家企業主導,台商根本無利可圖,咱國政府應該明確台商講,到底是應該「趨吉」(好孔的緊拚去)抑是「避凶」(歹孔的緊閃開)?陳士魁應講:「咱的評估應該是避凶(歹孔的緊閃開)」,因為「一帶一路根本是經濟計畫,是中國維持穩定維持政權的政治設計。」中國家己講已經投入一點六兆美金,通常是貸款以後用佇國家企業kah工程建設,「錢並是真正到hiah-ê國家」,是留佇中國國內,藉chit-ê機會消耗過頭濟的產能kah能量。

Che tio̍h奇怪lo͘h!2015年五月二一,馬英九總統講,台灣beh kah大陸發展和平關係,所以大陸推捒「一帶一路」kah亞投行,無管會hông罵抑是會hông阿老,咱一定tio̍h爭取加入一帶一路kah亞投行,才會tàng替台灣chōe tio̍h一條出路。舊年六月,海基會董事長林中森參加台商五日節座談會的時,公開阿老一帶一路是「新藍海商機」,叫台商tio̍h珍惜機會,「m̄-thang缺席」。   「一帶一路」到底是啥?2013年九月,中國共產黨總書記習近平佇中亞哈薩克演講提出「一帶」,是指ùi中國經過古早絲路頂面的中亞各國到歐洲所形成的「絲綢之路經濟帶」;仝年十月,佇印尼出席亞太經合會高峰會,伊正式提出中國願意kah東協國家合作共同建設「二十一世紀海上絲綢之路」,ùi中國經過東南亞、南亞、中東、北非到歐洲,kah沿路各國的經濟合作叫作「一路」。目前已經有六十國kah組織響應「一帶一路」,chiah-ê國家的總人口約四十四億、佔全世界人口的63%,經濟總量有21萬億美金、佔全世界的29%。   台北大學經濟系王塗發教授認為台灣tio̍h是過頭依賴中國、kah對方經貿高度連結,台灣經濟才會變chiah差。台灣經濟若beh好,mài插「一帶一路」,mài koh kā家己鎖佇中國,tio̍h行向全球,kā重點下佇美國、歐盟kah新興市場。   Chhun無一個月的馬政府僑務委員會委員長陳士魁kā咱講kah chiah白,hō͘咱知影馬總統足合意、中國所推捒的「一帶一路」是啥碗糕。感謝陳委員長!
 
< 前一個   下一個 >