首頁 arrow 綠色短評 arrow 一陣老公仔標飛去太平島創啥?

一陣老公仔標飛去太平島創啥? PDF Print E-mail
Written by 李南衡   
Wednesday, 11 May 2016
馬政府落台前十五工,專工派一陣老公仔標飛去太平島講是宣示主權。Chit陣老公仔標上老的是九十六歲的前參謀總長、前行政院長郝柏村,第二老的是九十一歲的前外交部長、前國安會秘書長丁懋時,中央有前行政院長毛治國、前國安會秘書長胡為真、前外交部長胡志強,前海巡署長王進旺,上少年的是六十八歲的前國安會秘書長蘇起。 Chit陣老公仔標到底beh宣示啥物主權?Kah馬英九總統仝款,選tī馬政府落台前、mā是菲律賓向國際仲裁法庭控告中國案teh beh有結果進前。馬英九直直beh證明太平島是一個島、m̄是一個礁岩。講起來不只好笑,菲律賓並無告太平島,國際仲裁法庭的仲裁,其實bē影響tio̍h咱佇太平島的經營kah實際佔領,但是會影響tio̍h中國佇南海所佔領的七個礁岩,是m̄是會tàng有12海里以外的權力。馬英九今年一月底去太平島,展示島上有會飲得的chiáⁿ水、植物生態、島上的官兵會tàng「自給自足」,三月邀請媒體團前往、四月邀請國際法學者作夥見證太平島是一個島、m̄是一個礁岩。其實菲律賓kah越南真正煩惱的,是佇台灣的中華民國所講的南海「十一段線」kah中華人民共和國所講的「九段線」,仝款講自古就是中國所有的,成作兩個中國所主張佇南海邊界kah各種權益的依據。中國一直鼓勵台灣強調宣示太平島的主權,那像一直鼓勵台灣強調宣示釣魚台是台灣的。因為中國的講法是按呢:釣魚台是台灣的,台灣是中國神聖不可分割的領土,所以釣魚島是中國的。那無,牽bē起來中國kah釣魚台有啥關係!   五月初四,立法院外交kah國防委員會由民進黨立委劉世芳提案,認為「南祥專案」飛去太平島來回六七點鐘chit陣老公仔標,無kah一個是現任公職人員、mā m̄是參與啥物學術研究工作,chit-choah行程差不多tio̍h開新台幣兩百五十二萬,in要求國防部、海巡署、國安會bē使用政府預算來支出chit條錢。本臨時提案無異議通過。   五月初五,海巡署副署長龔光宇表示海巡署bē出chit條錢。M̄知龔副署長是tèⁿ青抑是假戇,伊講2,700元的伙食費用,南巡局長劉國列決定家己出,因為內底有真濟大老攏是「老長官」,kā老長官收費無啥合倫理。龔副署長,咱是teh講兩百五十二萬、m̄是2,700元neh!講來講去,猶原郝柏村大將軍kah有氣魄,聽講chit-choah行程全部tio̍h自費,伊隨時應講「自費真合理」。咱目睭peh金金,看最後chit條錢是啥出的!   Khah奇怪的是,咱實在看無,一陣老公仔標飛去太平島創啥?
 
< Prev   Next >