首頁 arrow 綠色短評 arrow 台灣省廢了無清氣!

台灣省廢了無清氣! PDF Print E-mail
Written by 李南衡   
Wednesday, 18 May 2016
因為中華民國kah台灣省無論是土地抑是人口重疊了傷濟,致使1990年代由國民大會間接選出的總統kah民選的台灣省長tio̍h產生了行政區劃kah職權過頭重疊的問題。宋楚瑜tio̍h四百十二萬票(56%)當選省長,比1990年由國民大會間接選出的總統李登輝,加足懸的民意基礎。雖然1996年台灣總統直選,李登輝tio̍h五百八十一萬票(54%)成作台灣第一位民選總統,但是支持率猶輸宋楚瑜2%,而且宋省長全省行透透、四界掖錢,開公家的錢作私人的人情。差不多仝hit-ê時間,1991年六月十二,蘇聯下面俄羅kah伊的加盟國選總統,Eli-chin佇全民投票中tio̍h 57%當選俄羅總統,當時已經退出共產黨的Elichin宣布共產黨佇俄羅是非法組織,害共產黨頭人、由人民代表所間接選出的蘇聯總統Kopachhohu辭掉蘇聯共產黨總書記、koh建議蘇聯共產黨中央委員會解散。國家元首kah地方首長民意基礎、管轄的土地kah人民攏差不多的時,國家元首隱死無活。Chiah呢恐怖的代誌發生佇眼前,李登輝總統那有可能知咧? 廢掉台灣省,tio̍h無省長,無省長職位、無權無力的宋楚瑜tio̍h變無輦。所 以,1998年十二月二十起,台灣省政府因為功能業務kah組織調整,煞成作中央政府派出的一個機構。Ùi hit工台灣省長宋楚瑜卸任了後,tio̍h無koh有民選台灣省長,宋的是第一任、mā最後一任、唯一一任的台灣省長。有人講廢省誠好,按呢是佇小小一個台灣,層層tha̍h-tha̍h的行政機關拆掉「省」級的機關,對政府「瘦身減肥」真有幫贊。事實上,1967年台北市、1979年高雄市改作院轄市, 2009年koh kā高雄市kah高雄縣合併作一個新的院轄市,2010年台中市升格作院轄市,2014年桃園縣升格作院轄市,beh死beh死猶未斷氣的台灣省政府干單管三個市十一個縣,雖然所管轄的土地佔歸粒台灣的六成九,但是所管轄的人口才三成nia-niā。何況伊所管轄的省立學校已經改作國立;省立病院改作行政院衛生署(chit-má的衛福部)所屬病院;三商銀、台鐵等省屬公營事業機構,in的股權由台灣省政府移轉去中央政府各相關部門抑是民營化。無公thang辦的台灣省政府一年猶kā咱開一兩億的人民血汗錢,啥意思!頂遍爆發雇用因為發表侮辱台灣言論hông停職的郭冠英,ho͘伊做無一年tio̍h會tàng領一大筆退休錢。按呢咱tio̍h知影台灣省政府chit條已經爛去、隨時會發炎的盲腸無割掉bē使。   以前咱立法委員夯手夯輸人,chit-má新民意,一定tio̍h kā台灣省政府廢掉、廢hō͘清氣。按呢m̄-nā一年會tàng節省一兩億,而且此後中國tio̍h bē-tàng koh講:「台灣省是中國不可分割的一部分。」台灣都無省ah,猶teh講啥hàm古!
 
< Prev   Next >