首頁 arrow 綠色短評 arrow 台灣人民悲慘kah chit款!

台灣人民悲慘kah chit款! PDF Print E-mail
Friday, 16 January 2009
        台灣人無論信仰啥物宗教,敬神攏十分虔誠。有人歹kah敢騙人,卻m7敢欺神。台中有一位林太太看in子讀冊無認真,若ka7念,intioh8應講:安lah!無問題。有一工林太太大聲喝講:「你若考會tiau5台中一中,我做粿及你平高謝神!」Hit年聯考hit-e5囝仔真好運考tioh8台中一中,林太太有影做幾百塊紅龜粿及伊e5後生平高謝神明,而後紅龜粿分送hou7厝邊頭尾。林太太hit種「下願」叫作「嘴口願」,一旦實現ma7 tioh8照呼照行,m7敢欺騙神明。

        十二月初,台中縣豐原市有一位中年男子因為最近失業、手頭khah an5,入去慈濟宮躡走躡手、看四邊攏無人,才theh8出一張點一葩光明燈五百箍e5收據,希望會tang3退錢。宮方體諒人攏有錢銀三不便e5時陣,馬上退錢還伊。慈濟宮管理委員會總幹事講,點光明燈百外年來頭一遍拄tioh8此款「解約」e5情況。真害,hit幾工連續有三個人仝款來退五百箍。佇台灣史料上猶m7-batchit號信徒及神明訂契約了後,koh來及神明解約e5情形。人會按呢做,實在是萬分e5無奈、生活悲慘到盡磅ah

  十二月中,koh一個消息ma7hou7人聽tioh8真艱苦心。有一位老阿嬤去台中市家庭扶助中心,講伊有捐十二萬,因為最近身體無好勢tioh8開刀、需要用錢,希望伊e5捐款會tang3退還伊。照台中市家扶中心e5講法,最近愈來愈濟人需要in照顧,悲慘e5是贊助e5人顚倒愈來愈少、甚至要求退費e5人愈來愈濟。Hou7 in感慨愛心實在是拄歹景氣be7 tiau5

  是啥物政府ka7台灣景氣舞kah chiah-bai2?馬政府敢m7免處理解決?競選e5時講「馬上好」,半冬後才由伊e5部長講:「馬上好只不過是一句選舉口號。」馬英九ti7舊年三月二一得tioh8七百六十五萬票當選總統,超過五十八葩e5人支持伊。施政七個月後e5今年一月十三,世新大學公布e5民意調查結果,對馬英九總統滿意度chhun三十點一葩,不滿意度是五十六點六葩。咱看馬英九總統就任以來,主權大量流失,人權hou7 in囥佇土腳踏,經濟一工一工bai2,股票指數那坐溜籠直直溜落去,真正失業e5人數用「放無薪假」來掩蓋。馬英九總統ah,阮想kah無一項會tang3 ka7你阿佬。

  台中縣有人及神明解約退點光明燈e5錢,台中市有人及家扶中心解約退贊助e5錢。仝款e5道理,咱不滿意馬英九e5五十六點六葩e5台灣人,敢be7使及馬英九總統解約?可惜台灣人無充分e5公投權,無法度隨時表達咱e5真正意願,無法度馬上及馬英九總統解約,che是咱台灣人上悲慘e5所在!(090116)

 
< Prev   Next >