首頁 arrow 綠色短評 arrow 馬英九,台灣人會懷念你!

馬英九,台灣人會懷念你! PDF Print E-mail
Written by 李南衡   
Monday, 23 May 2016

五月二十,新總統蔡英文就任,舊總統馬英九落台。聽tio̍h馬英九總統落台,台灣人攏微微仔笑一下。最近,真濟人teh kā馬英九khêng數、算伊八年總統任內的功過;有人去地檢署告,聽講告伊有將近百五件;民進黨立法委員王定宇,馬總統八年來所承諾跳票的列表,五月十六講伊想會tio̍h的有五十五項,包括上有名的「六三三」(也就是伊的任內經濟成長率平均6%、失業率3%以下、國民所得達三萬美金),馬英九講若是無達成,願意捐出一半薪水,執政八年並無達成、「半薪」無捐出來。王定宇立委算算一下有2,277萬八千,伊講若無五月二十以前捐出來,馬英九就是「講白賊的成子」。果然是。

五月十二暗時,馬英九總統佇總統府宴請藍色的立法委員,有去參加的人轉述,馬總統佇宴會中khoaⁿ-khoaⁿ-á算伊一條一條的政績以外,無bē記得批評準總統蔡英文,講伊猶未就任tio̍h出問題,未來人民會kā伊馬英九kah蔡英文作對照組來比較,「人民會懷念我」。   馬英九的功過留hō͘歷史學家去評價,伊的罪kah罰留hō͘司法去處理。馬英九白賊話講一山坪,干單chit句話是真的,台灣人會懷念伊。   馬英九會hō͘台灣人懷念的第二點是:馬英九kah中國國民黨十外年來佇台灣所喝的「九二共識,一中各表」,台灣人一直會tàng忍受的是,馬英九kah中國國民黨所講的:「一中各表」雖然是一個中國,伊表伊的「中華人民共和國」,咱表咱的「中華民國」。舊年十一月,馬英九總統kah中國國家主席習近平佇新加坡的「馬習會」,全世界的人透過電視轉播攏有聽tio̍h馬英九kah習近平攏講:九二共識是佇一個中國的原則下。無人聽tio̍h馬英九佇習近平面前講出「一中各表」。Hō͘台灣人徹底覺醒,原來「一中各表」根本是無的、完全是騙咱的。   馬英九對台灣人上大的貢獻是:Kā中國國民黨舞kah beh倒去。因為他的施政,原本五個院轄市長中國國民黨有三個,2014年十一月二九的七合一選舉,院轄市變六個,中國國民黨煞chhun一個市長;台灣省14個縣市長中國國民黨原本有12個,七合一選舉煞chhun 6個;2008年總統選舉中國國民黨的馬英九得7,659,014票當選,2016年總統選舉中國國民黨的朱立倫得3,813,365票落選、削對半;2008年113席立委內底中國國民黨有79席、2016年變35席chhun無一半;台灣人喝:「國民黨無倒台灣bē好!」啥人有才調親像馬英九按呢,kā中國國民黨舞kah chiah悽慘?伊干單輸hit-ê kā中國大陸舞了了的蔣介石niā-niā。  馬英九,台灣人會懷念你!馬英九,台灣人會感謝你!
 
< Prev   Next >