首頁 arrow 綠色短評 arrow 中國,你mā mài管hiah濟!

中國,你mā mài管hiah濟! PDF Print E-mail
Written by 李南衡   
Tuesday, 31 May 2016

馬英九ta-ta叫的「九二共識」、中國國民黨列入黨綱。事實上,馬英九kah中國國民黨干單敢佇國內大細聲:「九二共識,一中各表」,無人敢佇中國官員頭前出聲,甚至2015年十一月初七佇新加坡的「馬席會」,干單聽tio̍h馬總統kah習主席作夥講:佇一個中國原則下的「九二共識」。並無聽tio̍h馬英九講啥物「一中各表」,͘台灣人看破腳手koh大受氣。今年正月十六大選,中國國民黨立委會ùi頂屆的64席、落kah chitchhun 35席,民進黨頂屆40席、chit屆變68席;民進黨的蔡英文大嬴中國國民黨的朱立倫三百萬票,當選總統。是台灣人對馬政府施政的失望kah不滿,表示台灣人看出「九二共識」是一場騙局。

中國一直恐嚇講:若無「九二共識」台灣會地動山搖。中國實在真厲害,講kah咱會驚。事實上2000年蘇起發明「九二共識」的前一年1999年,因為猶無「九二共識」chit-ê名詞,所以九月二一南投地動山搖;今年一月十六,蔡英文當選總統了,中國頭人足驚蔡英文無beh tī就任演說講「九二共識」,一直提醒「若無『九二共識』,台灣會地動山搖!」二月初六透早果然佇台南發生大地動;五月二十蔡英文就任前幾工,台灣大細粒地動無停。2008年五月十二,莫非是阿扁總統落任進前無喝「九二共識」,才害四川汶川地動山搖?   五月二十蔡英文就任總統演說講:尊重九二年兩岸兩會會談的歷史事實kah求同存異的共同認知,而且照中華民國憲法、兩岸人民關係條例來處理兩岸事務。伊的演說詞無一句是刺激抑是惹中國受氣的話。中國竟然無滿意,五月二五,中國國台辦發言人馬曉光講,蔡英文的就職演說「無明確承認『九二共識』」。伊koh講兩岸關係「是一條無法度閃避的『必答題』,無hit號霧霧無清的空間。」講tio̍h ná像bat佇政治大學教過冊的蔡英文教授是馬曉光發言人的學生!有人皮chiūⁿ欠人罵欠人拍,有一個「台灣工商團體秘書長聯誼會代表」專工走去北京拜託中國國台辦主任張志軍kā in罵罵一下:台獨無前途,若是舞台獨只有死路一條。伊強調,若是有堅持一個中國原則的政治基礎,兩岸tio̍h會tàng實現和平發展,台海mā才會安定,民眾mā才會得利。若是背離一中原則,兩岸關係tio̍h會出現反亂不安。伊的意思是講,蔡英文若親像馬英九按呢承認中國是on阿爸,逐項代誌都好辦。若無,台灣會地動山搖。生活佇地動帶的台灣人tio̍h注意!   五月二五,中國國台辦發言人馬曉光講,台灣教育部長潘文忠遵照立法院的 決議,以「行政命令」廢止歷史課綱微調的作法,警告「Tio̍h承擔後果!」按 呢是m̄是講中國一直有teh主導台灣的歷史課綱?中國,你mā mài管hiah濟!
 
< Prev   Next >