首頁 arrow 綠色短評 arrow 中國對台統戰的龜腳趖出來ah!

中國對台統戰的龜腳趖出來ah! PDF 列印 E-mail
發表者 李南衡   
2016/06/06, Monday
五月二五,中國國台辦發言人馬曉光對咱教育部長潘文忠遵照立法院決議,以「行政命令」廢止歷史課綱微調,警告講:「Tio̍h家己承擔後果」。台灣人想講:中國,恁閒仔事管傷濟!若inhe-ku bē忍得嗽」家己「落下頦」講講出來,咱那會知in管台灣教科書歷史課綱微調,in家己認定是足要緊的正事! 中國「中華奉元學會第28期電子報」指出,今年三月二六,中國人民解放軍總政治部聯絡部副部長辛旗少將講,伊透過台灣前國安會秘書長蘇起kah世新大學中文系教授王曉波兩人,tī 2008年向當時taⁿ-á當選總統的馬英九「傳達」應該更改台灣教科書,來扭轉台灣人天然獨的傾向。Chit位一直強調:「Beh滅一個國,tio̍h先滅伊的歷史」的辛旗將軍講,馬英九當選是一個真好的機會,應該kā教科書改倒轉來,而且是愈緊愈好,希望用八年的時間,爭取每年三十外萬少年選民,首投族八年落來tio̍h接近三百萬,也就是有十幾pha的選票。通過包括蘇起先生、王曉波先生在內的人,逐遍來,我攏用心計較kā in講,in講in mā無辦法。可惜等到馬英九第二任才beh改的時已經傷慢ah!伊講謝大寧、張亞中kah王曉波教授照實kā馬英九講mā bē赴ah!   有chit號干願作中國傀儡的馬英九,tio̍h有干願作中國傀儡的教育部,當然tio̍h有甘心樂意作中國傀儡仔的謝大寧、張亞中kah王曉波等教授,中國hit旁線若小giú一下,台灣chit旁的傀儡仔tio̍h會有相對應的動作kah發言。Ùi 1999年訂高中課綱以來,有經過四遍的調整,無一遍像chit遍2014年(in講是民國「103」)微調課綱chiah落氣!馬英九政府食緊弄破碗,原本教育部講是為tio̍h改一寡錯字才成立十人的「檢核小組」,出席名單kah會議紀錄攏烏箱作業,歷史科課綱檢核小組的總召集人竟然是王曉波,成員猶有張亞中、謝大寧等人,in無一個是讀歷史的,莫怪引起歷史學者、中學歷史教師kah全台灣高中學生的不滿kah抗爭,甚至包圍佔領教育部。一直teh含眠的教育部長吳思華落台進前佇立法院備詢的時猶講:「課綱微調一直攏無問題。」有影是目睭金金人傷重。   中國解放軍統戰部的辛旗將軍完全無法度瞭解佇自由民主社會所長大的少年人,有in自由思考、判斷kah選擇的能力,自主性真強的台灣少年人會疼惜家己的故鄉、家己的歷史親像疼惜家己,che叫作「自然獨」。所以2015年五月二四,全台灣高中學生才會發起反對烏箱作業的課綱微調。咱hit陣干單想bē曉,那會有hiah戇的教育部?Chit-má中國對台統戰的龜腳趖出來ah,咱才知影原來教育部只不過是一身(sian)傀儡。
 
< 前一個   下一個 >