首頁 arrow 綠色短評 arrow 馬英九講beh去香港,會hông笑!

馬英九講beh去香港,會hông笑! PDF Print E-mail
Written by 李南衡   
Monday, 20 June 2016

馬英九總統落任十工,tio̍h講伊今年一月有接tio̍h「亞洲出版協會」邀請伊去香港,出席「2016年度卓越新聞獎」頒獎典禮、並發表演說。六月初一提出申請講六月十五beh去香港。六月十二下晡,總統府發言人黃重諺召開記者會宣布,對馬英九的出境申請案,府方已經核定「不予同意」伊駁回:第一,馬前總統經管接觸的國家機密非常濟,而且拄仔卸任。第二,馬任內所經營抑是接觸的國家機密檔案kah資料,需要用khah濟時間來清查確認。第三,香港對咱國安全維護屬佇高度敏感地區。第四,國安局kah香港政府有關單位並無合作前例,卸任元首安全真歹得tio̍h確保。

馬英九明知有《國家機密保護法》約束卸任總統三年內bē-tàng隨便出國,伊有得tio̍h相當的禮遇,像講每個月二十五萬的禮遇金、每年有八百萬的事務人員處理費、供應保健醫療、供應安全護衛八至十二人。有權利就有義務,約束伊三年內bē tang隨便出國,若beh出國tio̍h向總統府申請。八冬前為tio̍h境管阿扁前總統,2008年五月三十,當時的總統府發言人王郁琦開記者會講,馬英九會tī卸任前將家己列作境管名單。馬英九無家己境管koh申請beh去香港會hông笑!   馬英九提出申請beh去香港的時講,伊會尊重總統府所作的決定。一下聽tio̍h總統府駁回伊的申請,馬英九辦公室隨時表示強烈遺憾,中國國民黨立委講che是民進黨政府打擊異己。按呢會hông笑la̍h!Koh-kha̍h好笑的是,質疑李登輝前總統2000年卸任一個月後,是按怎會使去英國?咱知《國家機密保護法》是2003年二月公佈實施的,2000年李登輝前總統去英國的時,猶無《國家機密保護法》thang約束伊,馬英九辦公室問chiah戇的問題,真正m̄驚笑破人的嘴?   六月十三透早,記者問馬英九針對總統府無准伊去香港的看法,馬英九回應講:「社會自有公評。」koh hō͘咱大笑一擺。2008年中國國國民黨的馬英九765萬外票黨選總統、民進黨的謝長廷544萬外票落選,中國國民黨立法委員69席、民進黨27席;2016年中國國民黨的朱立倫386萬外票落選、民進黨的蔡英文689萬外票當選總統;2008年立法委員中國國民黨69席、民進黨27席,2014年中國國民黨chhun 35席、民進黨變68席;2009年選舉中國國民黨嬴12個縣市長、民進黨4個;2014年中國國民黨chhun 5個縣市長、民進黨變12個;2010年院轄市五都中國國民黨the̍h 3個市長、民進黨2個;2014年院轄市六都中國國民黨chhun一個市長、民進黨變四個。馬英九ah!「社會自有公評」tio̍h是按呢。   馬英九,拜託你mài koh作chit類「卸示眾(sia-sìchèng)」、會hông笑的代誌。
 
< Prev   Next >