首頁 arrow 綠色短評 arrow 有骨氣的何韻詩上súi!

有骨氣的何韻詩上súi! PDF 列印 E-mail
發表者 李南衡   
2016/06/27, Monday
六月初二,香港獨立歌手何韻詩佇伊的面冊頂宣布,伊預定參加法國出名的化粧品品牌「蘭蔻」(Lancome),推廣香港市場的活動。六月初四,北京中國共產黨黨報《環球時報》問網友按怎看待「蘭蔻」請何韻詩代言?而且質疑「蘭蔻」kah何韻詩合作佇香港辦演唱會是變相支持「港獨」的行為,發動大量的中國網友喝beh全面抵制「蘭蔻」產品,迫「蘭蔻」宣布取消chitkah何韻詩合作的音樂會,特別強調是為tioh「安全理由」,引起輿論界議論紛紛,指出「蘭蔻」屈服佇中國共產黨的壓力。 六月初七,法國網民聯署請「蘭蔻」重新考慮kah何韻詩的合作,若無,beh發動罷買「蘭蔻」產品。In講:「阮不滿『蘭蔻』用che作為人權國法國的大使手法,為tio̍h商業利益去犧牲思想kah表達的自由,阮不滿法國公司屈服佇中國共產黨支配之下!」當然,「蘭蔻」無插in。   香港獨立歌手何韻詩拒絕打壓,無人合作無要緊,tī原本預定的時間六月十九下晡、佇原本預定的地點,家己辦一場「有種的漂亮」(The Beauty of WE)音樂會,台語我kā譯作「有骨氣的咱上súi」音樂會,打造一場「快樂koh安全」的社區免費音樂會。演唱一開始,何韻詩kā聽眾講:「多謝恁每一位有種的(有骨氣的)香港人。」斡正旁看左旁攏是挨挨陣陣的人,看頂面,附近的住宅、大樓、商店樓頂有真濟人探頭出來看,無疑誤會有三千外人來參加。   佇演唱中,何韻詩講:現此時的香港「無安全」(那像足驚馬英九m̄知),伊beh向勇敢kā中國政府惡行iah臭的銅鑼灣冊店店長林榮基說謝!香港人拄tio̍h中國的打壓,真濟攏是「自我消音」,想講吞忍會tàng換tio̍h中國的退讓,但是事實m̄是按呢。伊講,「無出聲」並m̄是代表「代誌會消失去」,人民若退一步,強權tio̍h會向你進一步。香港出名的歌手黃耀明mā來到現場,伊講當年夏韶聲的作品《你chiah súi的固執》,原本是作者送hō͘民主黨創黨主席李柱銘的,伊下晡特別來唱送hō͘何韻詩,突顯伊無驚世俗的眼光、堅持信念。   香港一位自由作家講:何韻詩chiah清楚向北京講“NO!”Hō͘咱香港人目睭金起來,知影hit-ê邪惡政權按怎橫行霸道。舊年三月二九,何韻詩有來高雄參加「大港開唱」,「好酒沉甕底」排佇上尾個,伊用純正的台語唱《島嶼天光》,講是向日頭花運動的朋友致敬,當伊唱出「勇敢的台灣人」的時敢m̄是呼籲kah伊仝款「勇敢的香港人」徛出來,敢m̄是mā期待香港「天色漸漸光」?   有骨氣的何韻詩上súi,阮kā你拍 pho̍k仔!
 
< 前一個   下一個 >