首頁 arrow 綠色短評 arrow 鈍刀的華航、出利手的何煖軒,讚!

鈍刀的華航、出利手的何煖軒,讚! PDF Print E-mail
Written by 李南衡   
Friday, 01 July 2016
台灣航空史上頭一遍罷工抗爭,選蔡英文總統就任後第一遍出國訪問的六月二四,蔡總統出門進前佇機場講,若是忍無可忍,無一個空服員會行向罷工。伊承諾維護空服員的勞動權益、整頓華航、重新華航chit塊看板拭͘金,che是新政府的重要任務。阮bē hō͘華航空服員感覺孤單。意思真明,tio̍h是講拜託恁chiah-ê行政團隊tio̍h kā代誌辦͘好。好佳哉,行政團隊無落氣。 六月二四罷工開始hit早起,何煖軒受命擔任中華航空公司董事長,伊隨時kah現任總經理、tio̍h是家己講beh做到八月底的張有恒連絡、參詳看beh按怎處理chit-ê罷工事件,張總經理無接伊的電話,聽講連賀陳交通部長、行政院林全院長的電話mā無接,林全院長火真to̍h、馬上撤換張總經理,展現政府的決心。   何董事長就任了tio̍h先釋出善意,公開答應空服員八大要求的第一項:免去桃園報到,會使佇台北報到。中晝趕到桃園機場罷工現場,空服員大聲喝:「無結果,罷工無停止。」下晡四點,何董事長chhōa華航新任總經理謝世謙、資深副總經理楊辰、黃遠蘋,kah工會理事長趙剛、副理事長洪蓓蒂、張書元、秘書長林佳瑋、發言人黃慧甄等人,去到勞動部開始勞資協商,抗爭二十一點鐘後達成共識,工會宣佈勝利、停止罷工,六月二七透早零點會開始復工。   原本五月二七,桃園空服員職業工會,有佇桃園市的勞資協商會議提出七項訴求,hō͘華航舊團隊拒絕。問題已經存在真濟年ah,m̄知華航是無才調處理、抑是無愛插員工,抑是thiau故意放hō͘爛,橫直我老大的按怎你攏無我法!   六月二七,看桃園空服員罷工有成果,華航企業工會mā提出八大訴求,講華航經營團隊若無答應,in會tī七月初一集體請假。何董事長全權委任謝世謙總經理kah資深副總經理一行人去談判,談兩遍了資方讓步,差不多八大訴求攏總接受。華航企業工會決定七月初一beh歡歡喜喜去上班。   Chit遍華航罷工kah放調beh集體請假的勞資糾紛,會tàng圓滿落幕,當然是華航勞方的拍拚堅持。但是,勞資糾紛會tàng圓滿解決,資方的誠意相當要緊。蔡英文新政府kah華航新經營團隊,若仝款無誠意解決代誌,相信華航員工beh爭取tio̍h家己的權益,猶有真長的路thang行。有人攻擊華航新經營團隊傷過軟,員工所要求的攏答應。相信何煖軒董事長應該是看真遠:錢的考慮,罷工提早一工結束公司tio̍h減了五億、減少旅客的困擾;事的考慮,員工的要求若有理、為啥物tio̍h顧面子一定堅持拒絕?人的考慮,員工才是華航上寶貴的資產。   咱真歡喜看tio̍h華航chit枝純刀,出何煖軒chit枝利手,讚!
 
< Prev   Next >