首頁 arrow 綠色短評 arrow 褪褲圍海的中國有夠拗蠻!

褪褲圍海的中國有夠拗蠻! PDF 列印 E-mail
發表者 李南衡   
2016/07/11, Monday

明仔載七月十二,佇荷蘭海牙的「國際仲裁法院」beh發表南海仲裁案的裁決。七月初五,佇美國華盛頓出席「中美智庫南海問題對話會」,中國前國務委員戴秉國那像先講先嬴,伊講:「南海仲裁案的裁決,只不過是一張廢張。」伊講南海群島是中國固有領土。並且呼籲美國保持中立,m̄-hó͘ⁿ強勢介入南海問題。中國國務院總理李克強早伊一天的七月初四講:中國反對任何海洋霸權,會盡力根據國際法,以直接對話解決海洋爭端kah糾紛。李克強總理講,中國盡力尊重佇歷史事實的基礎上,根據國際法,通過直接對話解決海洋爭諯kah糾紛,中國bē kā家己的意志強強逼別人接受。講kah真好聽。其實一個月前的六月初五,參加佇新加坡舉行的「香格里拉論壇」的中國首席代表、中共中央軍事委員會聯合參謀部副參謀長孫建國再次聲明:中國「不承認、不參與、不接受」南海仲裁,而且放調講:中國無beh惹代誌,mā m̄驚代誌。伊講,菲律賓提出的南海仲裁案假仙用國際法作名義,實際上是否定中國佇南海的領土主權kah海洋權益。伊講,南海仲裁對中國無約束力。

「南海仲裁案」是按怎來的?2012年,中國kah菲律賓的船隻佇海上相對teh無beh相讓,中國tio̍h強力控制漁業資源豐富的帕納塔(Panatag)礁,也就是中國所講的「黃岩島」附近區域。菲律賓講chit-ê區域是in的專屬經濟區、中國無應該侵佔。不得已,2013年一月,菲律賓根據《聯合國海洋法公約》關於爭端的解決以及附件七有關仲裁程序的規定,針對南海島嶼爭議向海牙常設仲裁法院單方面提起南海仲裁案。中國堅持南海自古以來就是中國的,上早是1947年中華民國政府提出「十一段線」,會使講是用一個那像牛舌型的布袋kā歸個南海攏袋入去。1953年中國周恩來總理講為tio̍h kah越南的友好關係,kā接近越南北部的兩線取消掉,變作現此時中國所主張的「九段線」。講起來中國立場徛bē在的點是,中國唯一的理由是「南海自古tio̍h是中國的」,「九段線」畫到越南、馬來西亞、汶萊、菲律賓幾國的門口,褪褲圍海講離中國幾千幾百公里的海攏是中國的,khah講mā是「歷史性的權利」chit-ê理由,全世界的人攏聽bē落去。   六月二九,設佇海牙的國際仲裁法庭發表聲明,beh tī七月十二針對菲律賓kah中國佇南海的紛爭作出裁決。中國隨時tī七月初三宣佈,ùi七月初五八點到七月十一八點beh佇南海相關海域進行軍事活動,禁止船隻駛入去。明明是耀武揚威,beh hō͘南海相關的國家看中國的拳頭母有偌大粒、看恁會驚boh!我無論按怎拗蠻,你有法我無?
 
< 前一個   下一個 >