首頁 arrow 綠色短評 arrow 蔡英文政府m̄-nā是面對問題的政府!

蔡英文政府m̄-nā是面對問題的政府! PDF Print E-mail
Written by 李南衡   
Monday, 18 July 2016
六月二四,蔡英文總統坐飛機beh出國去訪問巴拿馬kah巴拉圭hit早起,中華航空公司空服員開始罷工。出發前,蔡英文總統佇機場講,若是忍無可忍,那有空服員會罷工?佇飛機頂,伊對空服員廣播講,佇罷工chit條路頂,我會kah逐個作夥度過,bē hō͘恁感覺孤單。林全的行政團隊kah何煖軒董事長帶領新的華航經營團隊,二四點鐘內解除罷工,化解放調beh tī七月初一集體請假的華航企業工會危機。有人對chiah呢有效率的結果撥冷水講,員工要求的條件若攏接受,啥人曉解決問題?重點是員工的要求若有理,應該接受。當華航勞資雙方圓滿達成協議的時,華航員工大聲喝講:「Che是華航欠阮二十年的!」 七月初七,風颱beh來的前一暗駛到接近松山車頭的台鐵電聯車頂發生爆事件,造成二五人受傷。第一時間交通部長賀陳旦、警政署長陳國恩隨時進駐松山車頭指揮救災、護送受傷者、進行案情分析kah偵辦。第二工中晝,行政院長林全表示爆炸案排除是有組織的恐怖攻擊,應該是一件重大維安事件。有安定民心的效果。經過科學辦案,二四點鐘內宣布兇嫌是受重傷的一個、有充分物證kah DNA的比對。Hông感受tio̍h蔡英文政府是一個認真、有效率的新政府。   七月初八風颱造成屏東縣kah台東縣重大災難,特別是台東縣,釋迦、火龍果、芎蕉等農產品倒一遍;無論是住宅、學校,甚至病院,攏那像hō͘轟炸機空襲過的。七月初九,行政院長林全先去屏東,才去台東勘災。林全院長看tio̍h十七級風颱災情,當場宣布kā台東縣全區列作農業天然災害現金救助kah低利貸款地區,而且承諾七月十一會先撥農損救助金三億。初十暗行政院宣布,台東居民住宅受損害的每戶發救助金兩萬。林全院長作出八點裁示,包括補助從寛從速從簡、拜一先撥五億hō͘台東縣政府作救災復建調度之用。各項公共設施、學校受損修復重建,縣政府呈報了後,相關部會上慢一個月內完成現場勘查kah審議,加速災後重建。台鐵兩工中晝會開免費專車,號召社會善心人士kah各專業、醫療人員前往台東。七月初十,蔡英文總統先去綠島、蘭嶼才去太麻里,除了要求行政院加速設置重建站以外,特別向災民講:政府bē hō͘台東民眾感覺孤單,會全力投入災後復原,kā過去公共建設不足的所在補倒轉來。綠島居民看tio̍h蔡總統煞háu出來講,阮離島kah本島的船隻無開、阮無水電工、無鐵工,無人thang修理、水塔亦飛去ah!蔡英文總統講:我知我知。伊手比國防部長講,咱的國軍佇chia。逐個加油,咱需要耐心kah堅強。   蔡英文的新政府m̄-nā是面對問題的政府,koh khah是解決問題的政府!
 
< Prev   Next >