首頁 arrow 綠色短評 arrow 蔡英文政府解決問題有撇步!

蔡英文政府解決問題有撇步! PDF 列印 E-mail
發表者 李南衡   
2016/07/26, Tuesday

蔡英文政府上台了後有講,台灣社會的問題kah挑戰一個一個浮現出來,咱beh作一個解決問題的政府,民進黨希望逐個做夥來拍拚。六月二四早起華航空服員開始罷工,二十四點鐘內͘罷工停止、解決了華航二十年來的問題。七月初七,風颱beh來的前一暗,發生佇台鐵電聯車頂的爆炸事件,隨時鎖定受傷上嚴重的、上接近爆炸物hit個傷者是嫌犯,二四點鐘內宣布破案。Chit兩件重大社會事件,͘咱看出蔡英文政府解決問題有撇步:第一是以科學方法分析問題足準;第二是腳手誠猛(),咱知重大社會事件拖得、tio̍h速戰速決。

七月初八風颱天,國際犯罪集團開始分批來台灣,初九透早開始陸續佇台中kah台北盜領第一銀行ATM的錢;初十半暝分別佇台中、台北kah新北連續盜領第一銀行ATM的錢,十一透早錢領了後車手才出境。十一,第一銀行報案。十二,警方清查第一銀行攏總hông盜領八千外萬,鎖定安德魯等三個外籍嫌犯隨時境管,十四,警方清查了確認嫌犯安德魯猶留佇台灣、擴大追緝。十五警方確認有十一名外籍嫌犯,攏已經出境;刑事警察局公布十個嫌犯相片。七月十三ùi高鐵台北站的大型寄物箱區的監視器發現有外國人寄三大kha行李箱,隨時開始二四點鐘監視,因為高鐵台北站的寄物箱為tio̍h 防止罪犯利用寄物箱來藏贓物抑是犯罪的工具,明定寄物箱上久三工,確信三工內一定會有人來領。果然,七月十六,兩個外國人來領hit三大kha行李箱,動員警力跟蹤in住佇大直某高級飯店,警方無拍生驚in,當等有另外的嫌犯來chhōe in做夥掠khah有額。七月十八,台北市警察局警官宋俊良kah某子過晝了佇宜蘭東澳食飯,發現另外一桌當teh食飯的外國人足sêng警方公布的嫌犯安德魯,等伊食飽離開了,宋警官才趕去對面的派出所報案,請in趕緊去掠人。台北市刑警大隊得tio̍h安德魯落網消息,緊去大直的豪華飯店掠hit兩個嫌犯、帶回三大kha現金貯滿滿的行李箱。算算有6,204萬,欠兩千外萬。七月二十中晝借提安德魯去內湖山區chhōe伊所藏的行李袋,內底有1,263萬,猶欠成千萬。二十暗,一個柯先生去警察局交出講是早起佇內湖山區peh山的時khioh tio̍h的錢有454萬,鬥起來欠586萬niā-niā。 國際犯罪集團種入去的兩隻惡意程序,有一所在無家己刣死,調查局用chit兩隻惡意程式半暝拚去第一銀行測試,有影會hō͘ ATM吐出六萬元。才確認in免用提款卡免密碼,tio̍h會tàng hō͘ ATM自動開嘴吐錢。Chit種犯罪集團佇全世界盜領約新台幣三十億的錢,無人有法伊。咱台灣tī一禮拜內破案追回大部分贓款。咱應該向警政署kah調查局說謝!Mā確實相信蔡英文政府解決問題有撇步!
 
< 前一個   下一個 >