首頁 arrow 綠色短評 arrow 「中國國民黨黨產」死kah傷歹看!

「中國國民黨黨產」死kah傷歹看! PDF 列印 E-mail
發表者 李南衡   
2016/08/04, Thursday
一個已經失去自主行動能力、完全無意識的病人,歸身軀插大細條管kah靠「氧氣(ióng-khì)」維持生命,醫生知影chit-ê病人無可能恢復健康。但是病人的「有孝子」一再拜託醫生,無論按怎使hō͘伊的老父斷氣,緊急的時tio̍h盡一切的方法急救。原來chit-ê病人加活一工,伊的「有孝子」tio̍htàng加領一工in老父退休了寄佇銀行18%的利息。Chiah呢無尊嚴的死法對病人敢好? 逐個攏同意「中國國民黨黨產」chit-ê病人tio̍h愛好好作一個解決,若無,逐遍大小項選舉在野黨tio̍h會kā提起來罵。但是中國國民黨chit-ê「有孝子」m̄甘願hiah緊hō͘伊斷氣,因為好處太濟。台灣人目睭金金teh看,中國國民黨無作一個姿勢bē使得,包括馬英九幾位黨主席攏bat喝講「黨產歸零」,意思是「中國國民黨黨產」chit-ê序大人tio̍h hō͘死,事實上是一面ná喝假的,一面緊變賣黨產。   2002年,民進黨頭一遍提出《不當黨產處理條例》草案,但是立法委員一直無過半的情況下,經過十四年五屆立法院,攏hō͘中國國民黨團杯葛306攞退回程序委員會。事實上「中國國民黨黨產」太好用,每遍選舉中國國民黨中央會發hō候選人五百一千萬,聽講2000年總統大選補助總統候選人一百億,驚死人!好佳哉,錢m̄是萬能,台灣人若覺醒,開一百億的人mā是會落選。   M̄是台灣人看中國國民黨有錢目孔赤,實在是中國國民黨hiah濟的黨產大部分是「不義之財」。1949年中國國民黨輸kah褪褲走路來台灣,那有帶啥物黨產來?中國國民黨佇台灣是ùi戰後1945年十月二五來台灣開始劫收日產的,像講台灣放送協會(後日的中廣、今仔日的「地寶」)、十九間日本人的戲台、114棟日產房屋等,政府接收變作「黨產」甚至有的變作私人的財產;用低價數強迫徵收人民財產,上出名的是台北市文山區葉姓老百姓的八千三百外坪的土地,變作「國家發展研宄院」,2005年馬英九市長kā公告地價五十二億的土地賣四十二點五億hō͘元利建設。國產變黨產的,上有名的是現此時變作「張榮發基金會」hit棟大樓的土地,猶有全台灣各所在的民眾服務站;中華民國退出聯合國的時,驚hō͘中國接受去,中國國民黨緊劫收政府佇海外的資產。猶有中國國民黨投資的七大控股公司kah in投資的公司資金超過六千億。附隨組織像講「中國青年救國團」、「婦聯會」看攏總hut去偌濟錢?   「中國國民黨黨產」chit-ê病人無hō͘死,台灣人民不服。『政黨kah伊附隨組織不當取得財產處理條例』七月二五拚十點鐘、六十五遍表決才三讀通過,台灣人足歡喜。問題是,「中國國民黨黨產」chit-ê病人實在死kah傷歹看!
 
< 前一個   下一個 >