首頁 arrow 綠色短評 arrow 那會使軟土深掘kah chit款!

那會使軟土深掘kah chit款! PDF Print E-mail
Written by 李南衡   
Monday, 08 August 2016
發起罷工的桃園市空服員職業工會前幾日決議,針對六月二四罷工hit工猶原出勤服務的二十二個人,以不參加罷工作理由kā in除名處分,其中有十名是hit工擔任蔡英文總統出訪巴拿馬巴拉圭總統專機的中華航空空服員。 桃園市空服員職業工會無預警宣布第二工六月二四開始罷工,致使六十七班中華航空班機停飛,只有蔡英文總統就任後頭一遍出國訪問的「英翔專案」總統專機,照既定行程出發,華航早早tio̍h有選派好五名機師、十四名空服員beh佇專機頂服務,chit十四名空服員有十名是桃園市空服員職業工會會員。   蔡英文總統出訪的「英翔專案」總統專機是國家的外交大代誌、m̄是臨時決定的,所有機頂的機師kah空服人員早tio̍h經過挑選準備好的;桃園市空服員職業工會是民間團體,那會使壓過國家的外交大事咧!何況工會是臨時宣布第二工六月二四開始罷工的,有一位工會代表佇電視台談話性政論節目call-out的時,講in m̄知影六月二四hit工蔡總統的「英翔專案」總統專機beh出訪,意思是講in選六月二四罷工m̄是針對蔡總統出訪、專工beh hō͘蔡英文總統歹看。害談話性政論節目主持人kah特別來賓攏笑kah反反過,全台灣有看報紙有看電視有聽rajio的人,十工半個月前tio̍h知影,六月二四蔡總統beh出國訪問,那有可能干單負責總統專機華航的空服員職業工會的頭人m̄知咧,白賊講kah傷離譜。   蔡英文總統出國前佇機場講,若m̄是忍無可忍,無一個空服員會行向罷工。伊承諾維護空服員的勞動權益、整頓華航、重新kā華航chit塊看板拭hō͘金,che是新政府的重要任務。伊講阮bē hō͘華航空服員感覺孤單。意思真明,拜託恁chiah-ê行政團隊tio̍h kā代誌辦hō͘好。咱攏知影中華航空的大頭家是交通部,交通部的背後上大的大頭家是總統蔡英文,因為蔡總統chiah呢有同理心,kah華航空服員徛做夥,代表資方的華航董事長何煖軒才有可能拚落去,m̄-nā hō͘罷工一工內結束、而且解決華航幾十年來的大問題。桃園市空服員職業工會的頭人可能bē記得,全世界的勞資糾紛攏仝款,m̄是干單靠勞方努力拍拚tio̍h會達tio̍h目標,資方的誠意kah魄力足要緊,若無,勞資糾紛真oh得圓滿解決。   M̄-bat拄tio̍h chiah呢有誠意的資方,桃園市空服員職業工會煞好款起來,掠罷工hit工去為蔡總統出訪專機服務的空服員開刀。Mài講華航大頭家的大頭家蔡總統chiah呢疼惜空服員,koh-khah重要的是伊chit遍出國是為台灣的外交teh拍拚,每一個國民攏有義務kā蔡總統鬥相仝,工會顚倒恩將仇報、掠hit十個為蔡總統服務的空服員修理!良心何在?公理何在?那會使軟土深掘kah chit款!
 
< Prev   Next >