首頁 arrow 綠色短評 arrow 中國國民黨chit-ê溜尾仔子!

中國國民黨chit-ê溜尾仔子! PDF 列印 E-mail
發表者 李南衡   
2016/08/17, Wednesday
今年正月十六,總統kah立法委員大選,中國國民黨總統候選人朱立倫輸民進黨總統候選人蔡英文三百外萬票,朱立倫的得票率才31%、輸蔡英文的56%25% hiah濟;中國國民黨立法委員原本六十四席落45% chhun三十五席、民進黨原本四十席增加70%變成六十八席。Chit遍的大選,中國國民黨會使講是「美國西裝-大軀(大輸)」。勝敗是兵家常事,照理講,中國國民黨應該是檢討再檢討,好好改進以往的錯誤,招軍買馬,想辦法按怎hō͘台灣人對中國國黨有信心,兩年後縣市長選舉好好拚一下才tio̍h 無,in無按呢做,顚倒行歪路。七月三十,中國國民黨國發院院長林忠山表示,外界一直認為國民黨無重視少年人,早期有影是按呢,但是國民黨chit-má無仝ah,「老尻川全部無beh hōaⁿ家」,準備交hō͘少年人、重用少年人。伊表示,國民黨若搶政權轉來,「隨便tio̍h會tàng創造三萬個位」,勉勵黨內青年積極參政。Che是啥物國發院院長?伊講「外界一直認為國民黨無重視少年人,早期有影是按呢,」早期到底有偌早?上早期中國國民黨teh舞革命、beh推翻滿清的時,少年人攏是有血氣為理想teh拍生死的,那有人想tio̍h名位咧!林忠山院長鼓勵少年人積極參政,竟然是用「名位」作餌來釣少年人,有夠低級,那像烏道的老大teh誘拐不良少年的氣口。Chit款的中國國民黨敢猶有救?   七月二五,立法院臨時會三讀通過拚十年的《政黨及其附隨組織不當取得財產處理條例》,總統公佈了,八月十二生效。中國國民黨應該kā戰後1946年以來無論是國產變黨產的、霸佔國產的、侵佔人民財產的,攏總主動交出來。十二起完全bē使動用hiah-ê不當黨產。中國國民黨想beh kā黨產所chhun十外億現金拚hō͘空,m̄ hō͘你凍結in的現金。講beh預付黨工五個月的薪水、koh用1,200萬去訂做新式悠遊卡黨證。有人懷疑,chit款的作為,是m̄是現此時的黨主席洪秀柱,為tio̍h明年黨主席改選拚連任?Tio̍h請法律專家解釋,按呢敢會使講是期約賄選,為黨主席買票?另外,為tio̍h紓解「退職黨工十八葩優存」每年約六億的利息負擔,中國國民黨九月起beh準備七十至八十億,hō͘退職黨工協商「結清」優存的支出。特別唱聲,「十八葩」是國民黨過去的承諾,若是因為民進黨政府「政治清算」傷害tio̍h退職黨工的權益,因為信賴保護原則,「國民黨應該帶領逐個向民進黨政府追討,m̄免攬佇家己的身上。」按呢有sêng烏道的氣口無?   堂堂一個bat作過中華民國第一大黨的中國國民黨,今仔日竟然墮落到chit款,會hō͘真濟人hàiⁿ頭,罵講:中國國民黨chit-ê溜尾仔子!
 
< 前一個   下一個 >