首頁 arrow 綠色短評 arrow Siáng teh kah你兩岸一家親?

Siáng teh kah你兩岸一家親? PDF 列印 E-mail
發表者 李南衡   
2016/08/24, Wednesday
八月二三台北上海城市論壇佇台北舉行,煞想起舊年的代誌。tio̍h beh參加2015年八月十八佇上海舉辦的「上海台北雙城論壇」,三月三十,台北市新科市長柯文哲接受中國新華社中央電視kah中評社三間媒體聯合採訪談兩岸問題,伊想beh過九二共識,提出伊的「一五新觀點」,就是講:尊重兩岸過去已經簽署的協議kah互動的歷史,佇既有的政治基礎頂面,以「互相認識、互相了解、互相尊重、互相合作」的原則,堅持用「兩岸一家親」的精神來促進交流、增加善意,hō͘兩岸人民去追求koh-khah美好的共同未來。Hit下晡開始,中國大細粒官相續阿老柯市長,講伊對台北市kah上海市的城市交流合作誠有利,講「九二共識」柯市長留leh以後才講無要緊。今年三月,中國國台辦主任張志軍猶koh teh阿老柯市長講:「兩岸一家親是真重要的理念。 但是,對咱台灣人來講,「兩岸一家親」根本toh m̄是台灣人的語言,mā無可能會按呢想。身為台灣人的柯P市長,那會講出中國人的話咧?原來chit句話是中國國家主席習近平發明的。2013年四月初八,習近平佇博鰲會見蕭萬長一行人的時提出的四點希望,其中一點就是希望用「兩岸一家人」的理念促進兩岸經濟合作。仝hit年十月,習近平才kā「兩岸一家人」改作「兩岸一家親」。2014年五月,習近平會見親民黨主席宋楚瑜的時,伊強調,「只要咱攏ùi兩岸一家親的理念出發,tio̍h無啥物心結be-tàng化解,無啥物困難be-tàng克服。」   有人講柯市長真巧,會曉講中國上大粒的頭人的話,中國人聽了當然真爽。問題是咱台灣人聽tio̍h真鑿耳!咱台灣kah in中國tang時變作一家?咱頭戴青青的天、in頭戴烏sô-sô的天,咱用新台幣、in用人民幣,咱的媒體自由發揮、in的媒體姓「黨」,咱的台北市長是市民選出來的、in的上海市長是按怎來的柯P你敢知?台灣是台灣、中國是中國,田無溝水無流,一人一家代、公嬤隨人chhāi。Siáng teh kah你一家?逐個應該猶會記得,2005年台灣流行SARS,完全無世界衛生組織(WHO)的資料,WHO mā完全m̄知台灣的疫情,WHO是全世界人民的。咱想beh加入,中國代表吳儀講:「我嚴正指出,邀請台灣參加WHO是於法不符、於理不容、於情不合!」中國代表團離開會場的時,記者問講:「你敢無聽tio̍h台灣兩千三百萬人民的需要?」中國官員沙祖康受氣罵講:「Siáng插恁!」柯P市長,借問一下按呢是beh按怎親?Mài講中國安一千五百粒飛彈向台灣,干單想tio̍h中國官員對咱台灣人hiah呢殘忍無血無目屎,台灣人ti̍ioh歸腹火!   Siáng teh kah你兩岸一家親?
 
< 前一個   下一個 >