首頁 arrow 綠色短評 arrow 作賊心虛e5中國

作賊心虛e5中國 PDF 列印 E-mail
2009/02/02, Monday

二00九年一月二十,Obama佇美國首都華盛頓宣誓就任第四十四任美國總統,並且隨時發表十八分鐘e5講演。差不多全世界e5電視攏有轉播,中國e5中央電視台ma7真拍拼作現場實況轉播。美國明知中國是一個無新聞自由e5國家,ma7 khah有心一下,事先小透露一下Obama就任總統講演e5內容,才be7 hou7中國舞kah無閒chhih-chhih、頭眩目暗。

咱知影美國時間一月二十日時,佇東方e5咱來講是一月二一透早,hiah呢拼勢半暝仔tehe5ma7無真濟。中國官方e5中央電視台為tioh8 beh表示in及世界接軌,當然tioh8作現場實況轉播,而且現場有作同步口譯。Chit-e5 Obama總統ma7真害,無代無誌講啥物:「咱老一輩e5m7kan-taN用飛彈及戰車,實在是用穩定e5聯盟及擋久e5信念戰贏了法西斯主義及共產主義。」哇!那會按呢?中國e5中央電視台趕緊切掉,換另外一個主播講一寡經濟問題,佇美國hit旁採訪e5記者ma7忽然間煞m7beh按呢接續落去講。Obama總統e5就職講演當然tioh8 koh繼續播送落去,講a2講,Obama總統koh講一寡完全無合中國政府胃口e5三八話:「Hiah-e5tioh8腐敗及欺騙,通過m7 hou7別人發表in e5看法,來維持家己權利e5人,恁應該知影,恁是徛佇歷史e5反面。」Chit種話無刣掉ma7 be7使得!

美國Obama總統e5就職講演,中國中央電視台若攏無刪除刣切,ma7無真濟中國人會看tioh8會聽tioh8。就是hou7你看tioh8tioh8,你是會tang3按呢?中國中央電視台會chiah呢緊張,明明就是作賊心虛。但是,中國外交部發言人講:中國e5媒體及其他國家e5媒體仝款,有家己e5編輯權利。第二工中國官方e5《人民日報》ma7無看tioh8 chit兩節話。中國政府會刣掉chit兩節話,表示inchit兩節話真在意,愈在意tioh8愈擔心,愈擔心tioh愈愛禁。人民e5立場顚倒反,你政府愈愛禁,我tioh8愈愛知,愈愛知tioh8愈愛看愈愛聽。咱bat經過白色恐怖壓制言論自由時代e5台灣人,攏猶會記得中國國民黨政府查禁e5冊及雜誌,咱tioh8愈愛買愈愛看,查禁e5歌咱tioh8愈愛唱愈愛聽。政府愈按呢作就是表示in無自信,咱tioh8愈愛hou7 in漏氣!

美國Obama總統就職講演e5一段話:「Hiah-e5tioh8腐敗及欺騙,通過m7 hou7別人發表想法,來維持家己權利e5人,恁應該知影,恁是徛佇歷史e5反面。」m7但講hou7中國共產黨e5中國政府聽,hou7 intioh8會驚,ma7是講hou中國國民黨e5馬政府聽,m7知馬政府有驚tioh8抑無?

 
< 前一個   下一個 >