首頁 arrow 綠色短評 arrow 台灣就是台灣。當然!

台灣就是台灣。當然! PDF 列印 E-mail
發表者 李南衡   
2016/09/07, Wednesday

八月三十一,佇台中洲際棒球場舉行的「亞洲青棒台‧日賽」,有一陣靜宜大學學生夯「台灣就是台灣 Taiwan is not Chinese Taipei」的布條加油,遭受tio̍h棒球協會人員去kā in大力liah-liah歹,而且請hit陣靜宜大學學生馬上離開現場,靜宜大學學生只好無奈離開球場。In去警察局報案,有一位律師beh配合學生球迷第二工九月初一去台中地檢署提出控告。

九月初一透早,台中市政府新聞局長卓冠廷召開記者會,發表三點聲明:第一,市政府會tàng理解棒球協會希望引用國際性比賽相關的規定。但是相關規定bē使造成人民權益受傷害。佇無牽涉tio̍h比賽的前提下,應該保障言論自由,che是林佳龍市長所認為的,佇台灣、特別是佇台中市上蓋應該珍惜的民主價值。第二,市政府已經kah棒球協會溝通,對chit遍棒球協會liah歹布條造成衝突,棒球協會應該進行檢討、改善kah彌補,而且加強職員教育訓練,避免koh再發生類似的情況。第三,市府會加強警力支援,確保球場安全kah球迷權益。   台中市政府chit遍腳緊手快、出來維護市民自由kah權益,咱kā阿老:贊!   九月初一beh畫ah,棒球協會針對前一工有學生佇亞洲青棒賽觀眾席夯「台灣是台灣」標語、hō͘ in liah歹chit件代誌會失禮。In會要求工作人員今後teh處理類似事件的時,tio̍h注意方式kah態度,避免造成糾紛。到chia為止算是有誠意。續落去,棒協秘書長林宗成講:國際賽事ùi申辦到執行攏tio̍h承諾,場內bē使出現政治性標語抑是違反善良風俗的海報。咱實在m̄知影伊那會講出chit種話!「台灣就是台灣」“Taiwan is not Chinese Taipei”(台灣m̄是中國人的台北),只不過是講出一個事實,那是啥物「政治性標語」?借問咧,che是違反叼一國的「善良風俗」? 伊假作無常識m̄-bat字講:政治性議題m̄是棒協會tàng單獨處理的,希望地方政府會tàng制定一套處理的標準,hō͘比賽的主辦單位有所依偱。意思是講伊猶原認定:「台灣就是台灣」“Taiwan is not Chinese Taipei”(台灣m̄是中國人的台北)是政治性議題。那會chiah塞頭?   蔡英文政府上台以來,上大的敗筆就是大部分官方事業機構的頭人攏無換,完全藍皮藍骨藍血藍肉,歸頭殼攏猶是中國國民黨hit套黨國保守思想,in自私自利互相掩蓋做代誌的作風kah早前完全仝款,in非非sám作的後果,攏tio̍h蔡英文總統來承擔,仝款的情形佇體育界,所有各種協會頭人攏原封不動,in m̄知影「台灣就是台灣」、m̄知影自由民主人權生作啥物款。蔡英文總統一定tioh夯大刀斬斬phut-phut一下,完全執政tio̍h完全負責。善良的台灣人攏按呢teh期待!
 
< 前一個   下一個 >