首頁 arrow 綠色短評 arrow 少年ē徛起來ah!

少年ē徛起來ah! PDF 列印 E-mail
發表者 李南衡   
2016/09/12, Monday
九月初四,香港舉行第六屆立法會三十五席直選結果正式出爐非建制派有十九位當選,比頂屆加一席;親中的建制派有十六位當選,比頂屆減一席。Chit遍選舉的投票率kah投票人數攏是破紀錄上懸的,會tàng解釋作:香港人經過幾遍政治衝突kah社會運動了後,對選舉的重視。 無管中國派駐香港的「中聯辦」介入選舉的手段愈來愈明顯kah粗殘,而且梁振英特首有幾遍放調,beh kā支持「佔中運動」的議員踼出議會,煞顚倒引起香港人的懷疑:按呢敢是中國所講的「一國兩制」?致使選舉結果拍破早前悲觀民調的預測。Chit遍香港立法會選舉的結果,有幾點值得咱阿老:第一,長期參與環保運動三十二歲的朱凱迪,佇新界西區第一懸票當選;長期舞社區運動四十歲的劉小麗,佇九龍西區第三名當選;幾年來參與學生運動、「佔中雨傘」運動公民團體創立的新政黨「香港眾志」,kā主席羅冠聰送入去議會,佇香港島十五名候選人選六名的競爭下,伊第二懸票當選,值得注意的是伊二三歲niā-niā,是香港歷史上第一少年的立法會議員;香港弱勢者佇議會有代言人ah!第二,香港人在地意識提升。兩年前「雨傘運動」了,透過網路論壇,有三位本土主義足明顯的候選人當選,包括「熱血公民」三十三歲的鄭松泰,佇新界西區二十位候選人拚九席的競爭下,第四名當選;訴求香港民族前途自決的「青年新政」、三十歲的梁頌恒,佇新界東區二十二名候選人拚九席的情況下,第七名當選;仝款是「青年新政」的游蕙禎,佇九龍西區十五名候選人拚六席的情況下,吊車尾當選,值得注意是伊才二五歲niā-niā。第三,二、三十歲的少年人取代了hông批評kah誠厲害的「大佬文化」,真濟政壇老將佇chit遍選舉中跋落馬。佇「超越區」the̍h tio̍h四十九萬外票、香港第一的民主黨新人鄺俊宇才三十二歲。   新科議員羅冠聰接受「法新社」訪問的時講:「我想是因為香港人真想beh改變,當少年人teh談論未來的時,in真正感受tio̍h攺變的迫切性。Chit遍選舉hō͘香港少年民運領袖,頭一遍tam-tio̍h真正政治權力的滋味,mā顯示「佔中雨傘運動」少年族群的理念,已經撼動tio̍h香港loh。   今年正月十六台灣立法委員選舉,二十出頭歲的少年ē出來參選的有誠十位,少年人無必要bih佇中國國民黨大枝雨傘下面爭取作「不分區立委」,chit遍中國國民黨大敗,in啥物mā無。像綠黨社會民主黨聯盟、樹黨、台灣獨立黨、時代力量、中華統一促進黨、自由台灣黨等,佇地方認真經營拍拚才是正途,拚久一定會開花結子。咱真歡喜,台灣的少年ē mā徛起來ah!
 
< 前一個   下一個 >