首頁 arrow 綠色短評 arrow 啥人是共匪仝一路的人?

啥人是共匪仝一路的人? PDF 列印 E-mail
發表者 李南衡   
2016/09/19, Monday

九月十四,海基會佇台中舉辦「2016大陸台商秋節聯誼活動座談會」,「台企聯」會長王屏生接受訪問的時指出,兩岸現在交流中斷,tio̍hkhê佇「九二共識」;九二共識是真簡單的代誌,一個中國的概念是真清楚,那會無愛講?

頭一遍看tio̍h「共匪仝一路的人」,是各報紙teh罵《自由中國》雜誌。我一直認為《自由中國》雜誌是佇台灣掖自由民主種籽,用智識份子良心批評時政,那會是「共匪仝一路的人」咧?思考真久,原來是任何kah執政的中國國民黨無siâng意見、甚至有反對的人,kah共匪款仝反對中國國民黨的,準無共匪hiah呢萬惡,至少mā有百惡千惡,教台灣人來反對《自由中國》雜誌。   二十冬後,中國國民黨政府講:近年來佇海外有一小撮人,生佇台灣,由中華民國政府培育成長,猶未報答國家竟然背祖,bih佇外國舞「台灣獨立」,kah共匪鬥陣舞「島內革命」、為共匪武力犯台陰謀鋪路,in是「共匪仝一路的人」。   2002年一月,民進黨佇台灣已經執政年外,bat作過中國外交部長、國務院副總理的錢其琛講,歡迎廣大的民進黨員,但是無歡迎頑固的台獨分子訪問中國。哦,原來台獨分子m̄是「共匪仝一路的人」。按呢,到底啥人才是咧?   2008年十一月初,中國海協會會長陳雲林訪問台灣tòa佇台北圓山飯店,坐o-tó-bái夯中華人民共和國國旗佇台北市大街路揚揚飛無代誌;台北市立美術館前夯中華民國國旗抗議的群眾,旗篙hō͘馬政府的警察at斷、國旗hō͘ in沒收。   2010年六月初,bat作過台灣空軍上將、第一任國防大學校長的退役將領夏瀛洲佇中國講:今後mái koh分啥物國軍共軍,咱攏是中國軍隊。   2014年七月,bat作過台灣參謀總長、行政院長的郝柏村上將,去中國參加七七蘆溝橋事件七十七周年紀念,七月初九接受中國中央電視台訪問的時,大聲唱出「義勇軍進行曲」。李登輝前總統講,chit首歌原本是軍歌,後來變作中華人民共和國的國歌,對國民政府來講是禁歌,我m̄知伊按怎想。   2016年九月初一,中國國台辦主任張志軍講,兩岸兩會若beh恢復商談機制,tio̍h確認「九二共識」chit-ê共同政治基礎。九月初三,中國國民黨黨代表大會,主席洪秀柱所提的政策綱領,干單講「九二共識」,kā馬英九騙台灣人八年的「一中各表」刣掉,希望按呢會tàng簽署兩岸和平協定。九月十四,海基會前會長江丙坤講,「九二共識」是橫跨台灣海峽的一座鐵橋的橋墩,橋墩若無去,海基會kah海協會的平台tio̍h無去。   按呢,你敢看會出來啥人是「共匪仝一路的人」?
 
< 前一個   下一個 >