首頁 arrow 綠色短評 arrow 戇人想beh搭海峽兩岸的橋樑!

戇人想beh搭海峽兩岸的橋樑! PDF Print E-mail
Written by 李南衡   
Friday, 23 September 2016

由新竹縣長邱鏡淳、苗栗縣長徐耀昌、南投縣長林明溱、連江縣長劉增應、新北市副市長葉惠青、台東縣副縣長陳金虎等六位中國國民黨地方首長,kah花蓮縣長傅崐萁、金門縣副吳成典等兩位無黨籍縣長所組成的八人參訪團,九月十八去中國北京訪問。得tio̍h中國全國政協主席俞正聲kah中國國台辦主任張志軍分別接見,俞正聲致詞講:「逐個攏是堅持『九二共識』的地方領導,chit時來大陸訪問,有特別重要的意義。」伊講,大陸堅決支持一個中國原則,九二共識的核心就是一個中國原則,堅決反對台獨,che是大陸的底線,任何破壞一個中國原則的行為,兩岸人民攏答應。參訪團向中國提出三項主張:第一是希望陸方繼續探購台灣農特產品、第二是擴大兩岸觀光kah文化交流、第三是透過大陸各地旅遊局kah台灣各地方政府建立窗仔口,行銷優質行程並保障遊客安全、提升旅遊品質。中國答應beh hō͘ chit八縣市「差異化的待遇」,包括觀光、農業、智慧科技kah人文交流等八項利多。

民進黨立委林俊憲佇面冊頂面批評講:「永過有吳三桂,今仔日有藍八奴」。九月十九,花蓮縣政府發新聞稿講,縣長傅崐萁認為身為百姓父母官tio̍h勇攻承擔,苦民所苦、以民為本,地方政府願意成作兩岸交流的橋樑、前鋒。苗栗縣長徐耀昌受訪問的時指出,八縣市長是teh幫助執政當局做一個磨合、搭一座友善的橋樑。伊講「友善的橋樑」就是中國講「一個中國」,in緊應講:是是是!   兩位縣長真無記持!舊年馬英九總統kah中華人民共和國國家主席習近平,佇新加坡見面所謂的「馬習會」了後,馬總統足得意,講伊推動「馬習會」是為tio̍h下一任的總統,伊講「橋已經搭好ah,任何人攏會使peh起去橋頂,但是tio̍h遵守交通規則。」民進黨總統參選人蔡英文回應講,chit座橋目前看起來是無啥穩。台灣人相信蔡英文的話,總統選舉hō͘伊六百八十九萬四千七百四十四票。hō͘ hit座「九二共識、一個中國」橋害tio̍h,中國國民黨總統候選人朱立倫才得tio̍h三百八十一萬三千三百六十五票,一差tio̍h差三百萬票。立法委員,中國國民黨ùi六十四席跋落到三十五席、民進黨ùi四十席增加到六十八席。   上好笑的是中國國民黨文傳會副主委胡文琦講,八個縣市長破冰之旅,蔡英文政府看別人好煞目孔赤。蔡英文總統得tio̍h台灣人五十六點一二%的支持,去中國hit八個縣市長鬥鬥起來才十二點六五%支持,有啥thang目孔赤?Chit八個縣市長m̄知家己的民意基礎才十二%外niā-niā,乞食下大願,學馬英九beh為海峽兩岸搭一座「九二共識、一個中國」的橋樑,有夠戇。後遍選舉in tio̍h知慘!
 
< Prev   Next >